Fermerët mund të aplikojnë nga sot për përfitimin e kompensimit të TVSH-së për produktet bujqësore dhe blegtorale të shitura përmes autofaturave.
Skema zbatohet për fermerët e pajisur me NIPT, të cilët kanë shitur produktet e tyre te grumbulluesit, përpunuesit apo agroturizmet e certifikuara. Sipas të dhënave të administratës tatimore, në vend janë 113,470 fermerë të pajisur me NIPT.
Masa e kompensimit do të llogaritet automatikisht mbi bazën e vlerës së autofaturave të lëshuara nga blerësi i produkteve bujqësore. Fermerët duhet të hyjnë në sistemin e-Filing, te menuja “Çështje e re”, dhe të zgjedhin kërkesën “Për rimbursim të fermerëve”.
Më pas duhet të plotësojnë të dhënat e llogarisë bankare, përfshirë numrin IBAN. Në sistem do t’u shfaqen autofaturat për periudhën janar-qershor, të cilat fermeri duhet t’i identifikojë dhe përzgjedhë.
Pas këtij hapi, sistemi llogarit automatikisht shumën totale të autofaturave dhe vlerën e kompensimit në masën 10%. Sipas tatimeve, sistemi kontrollon afatin, faturat dhe llogarinë bankare përpara pranimit të aplikimit.
Kërkesa merr statusin “Në proces”, ndërsa përgjigjja mund të ndiqet nga fermeri në menunë “Të dorëzuara”.
Për të përfituar kompensimin, fermeri duhet të jetë i pajisur me NIPT, por të mos jetë subjekt i regjistruar për TVSH.
Qarkullimi vjetor nuk duhet të tejkalojë kufirin minimal të regjistrimit për TVSH, që është 10 milionë lekë.
Nëse fermeri rezulton i regjistruar me TVSH, ka status pasiv, nuk plotëson IBAN-in, nuk zgjedh faturat apo aplikon jashtë afatit, kërkesa bllokohet.
