Gazetarja Ola Xama ka denoncuar përmes një reagimi në rrjetet sociale situatën që, sipas saj, po krijohet nga aktiviteti i guroreve në zonën e Palasës dhe Dhërmiut, duke ngritur shqetësime për ndikimin në mjedis dhe turizëm.
Ajo shkruan se në zonë funksionojnë të paktën tre gurore, ndërsa ngre pikëpyetje nëse janë të licencuara dhe si lejohet aktiviteti i tyre pranë një zone të mbrojtur, duke theksuar se po dëmtojnë mushkëritë e pushuesve, peizazhin dhe ekosistemin.
Sipas Xamës, pluhuri i krijuar nga guroret mbulon hotelet, vilat, restorantet dhe plazhet, duke e bërë të vështirë pushimin e turistëve.
Ajo thotë se gjatë qëndrimit në Dhërmi është detyruar të qëndrojë brenda ambienteve, pasi pluhuri është bërë i padurueshëm.
Në reagimin e saj, gazetarja shton se bizneset e zonës ankohen për largimin e klientëve dhe humbjet gjatë sezonit turistik, por, sipas saj, shmangin deklaratat publike nga frika e ndëshkimeve.
Në fund, Xama i bën thirrje kryeministrit Edi Rama të ndërhyjë për të garantuar ajër të pastër dhe mbrojtjen e shëndetit të pushuesve, veçanërisht të fëmijëve./skyweb.al
