Qendra Kombëtare e Biznesit u ka bërë thirrje të gjitha subjekteve tregtare që kanë detyrimin ligjor për depozitimin e pasqyrave financiare vjetore për vitin ushtrimor 2025, që ta përmbushin këtë detyrim brenda datës 31 korrik 2026.
Sipas njoftimit, depozitimi i pasqyrave financiare kryhet në mënyrë elektronike përmes portalit e-Albania, nëpërmjet shërbimit “Depozitimi i pasqyrave financiare dhe raporteve të auditimit (për subjektet me administrator shqiptar dhe/ose të huaj)”.
QKB thekson se mosdorëzimi i dokumentacionit brenda afatit ligjor sjell pasoja administrative, në përputhje me parashikimet e ligjit nr. 9723, datë 3.5.2007, “Për Qendrën Kombëtare të Biznesit”, i ndryshuar.
Dokumentet që duhet të depozitohen, në rastet kur mbajtja e tyre është e detyrueshme me ligj, përfshijnë pasqyrat financiare vjetore, raportin e ecurisë së veprimtarisë si dhe raportin e auditimit.
Detyrimi për raportimin dhe dorëzimin e pasqyrave financiare i takon subjekteve që janë tatimpagues të Tatimit mbi Fitimin Korporativ ose Tatimit mbi të Ardhurat Personale Biznesore, kur realizojnë një qarkullim vjetor mbi 5 milionë lekë.
Qendra Kombëtare e Biznesit u bën apel bizneseve që të mos e lënë procesin për ditët e fundit, me qëllim shmangien e vonesave apo problematikave teknike gjatë aplikimit online.
Për më shumë informacion ose asistencë teknike, subjektet mund të kontaktojnë në adresën asistencaonline@qkb.gov.alose në numrin pa pagesë 0800 80 02.
