Kryeministri Edi Rama ka reaguar pas kritikave për financimin e koncertit të Kanye West, duke argumentuar se qeveria ka vendosur në dispozicion 4 milionë euro “në minutën e fundit” për të garantuar zhvillimin e eventit dhe për të shmangur, sipas tij, dëmtimin e imazhit të Shqipërisë.
Rama shkruan se koncerti pritet të ndiqet nga rreth 25 mijë të huaj nga 80 shtete, të cilët kanë blerë prej kohësh biletat, ndërsa e cilëson aktivitetin një mundësi të rëndësishme për promovimin e turizmit shqiptar dhe nxitjen e ekonomisë.
Sipas kreut të qeverisë, përfitimet ekonomike nga eventi pritet të arrijnë të paktën 100 milionë euro, duke iu referuar edhe rritjes së rezervimeve në Booking. com për fundjavën e koncertit. Ai krahason ndikimin ekonomik të pritshëm me finalen e Conference League, e cila sipas UEFA-s solli rreth 160 milionë euro të ardhura.
Në reagimin e tij, Rama kundërshton edhe akuzat se fondet e përdorura për koncertin janë marrë në dëm të shëndetësisë apo kategorive në nevojë.
Ai kujton se vetëm pak ditë më parë qeveria ka miratuar fonde shtesë për ilaçet e pacientëve me kancer, aparaturat mjekësore, personat me aftësi të kufizuara, fëmijët me aftësi të veçanta, startup-et, garancinë sovrane për bizneset, si dhe bonusin për pensionistët.
Kryeministri sulmon ashpër kritikët në rrjetet sociale, të cilët i cilëson “sorra dhe korba”, duke i akuzuar për manipulim dhe përpjekje për të penguar zhvillimin e vendit.
“Nuk kanë për ta ndalur Shqipërinë dhe nuk ka asnjë shans të kthehet mbrapsht”, përfundon Rama në reagimin e tij.
