Kuvendi i ka kërkuar Komisionit të Prokurimit Publik, i njohur ndryshe si “Gjykata e Tenderave”, të analizojë një nga problemet më të ndjeshme të prokurimeve publike, procedurat ku në garë paraqitet vetëm një ofertues.
Në rezolutën për vlerësimin e veprimtarisë së KPP-së për vitin 2025, Kuvendi vëren se ankesat për tenderët janë rritur dhe se një pjesë e konsiderueshme e tyre janë pranuar plotësisht ose pjesërisht.
Kjo tregon se në shumë procedura ka pasur shkelje ose problematika që janë korrigjuar pas ankimit të operatorëve ekonomikë.
Kuvendi evidenton se burimet kryesore të kontestimeve mbeten dokumentet e tenderit dhe mënyra e vlerësimit të ofertave. Në të njëjtën kohë, kërkohet më shumë kontroll mbi zbatimin e vendimeve të KPP-së, pasi institucioni duhet të raportojë çdo 6 muaj në Kuvend për nivelin e zbatimit të tyre dhe problematikat e konstatuara.
Pjesa më problematike e evidentuar nga Kuvendi në lidhje me KPP-në lidhet me tenderët me një ofertë të vetme.
Kuvendi kërkon që KPP të bëjë një analizë të detajuar për faktorët që ndikojnë në nivelin e konkurrencës në prokurime, duke evidentuar veçanërisht rastet kur në procedurë merr pjesë vetëm një ofertues.
Komisioni duhet të raportojë edhe për masat që janë marrë për rritjen e konkurrencës, zgjerimin e pjesëmarrjes së operatorëve dhe përdorimin më efikas të fondeve publike. /skyweb.al
