Një hetim i nisur kryesisht nga Prokuroria e Durrësit për paligjshmëri në zyrën vendore të ASHK-së ka zbuluar dyshime për përvetësimin e të paktën 30 mijë m2 tokë shtet në zona të lakmuara të bregdetit.
Hetimet kanë evidentuar përgjegjësi të zyrtarëve dhe ish-funksionarëve të ASHK Durrës, si dhe personave të tjerë, në gjashtë raste të falsifikimit të regjistrave hipotekorë.
Një burim pranë Prokurorisë së Durrësit tha se janë sekuestruar 15 regjistra të ASHK-së, nga ku janë konstatuar falsifikime në gjashtë raste. Skema dyshohet se është kryer duke hequr nga regjistrat fletët ku shënoheshin të dhënat për toka në pronësi të shtetit.
Ato janë zëvendësuar me fletë të tjera, ku si pronarë të ngastrave figuronin individë që nuk kishin asnjë lidhje me pasuritë. Më pas, pronat janë tjetërsuar nga personat që dyshohet se u bënë pronarë përmes falsifikimit të regjistrave hipotekorë.
Nga hetimet e deritanishme rezulton se përmes këtyre falsifikimeve janë përvetësuar të paktën 30 mijë m2 tokë në fshatin Kallm dhe në zonën e ish-NB Frutore të Durrësit.
Falsifikimet janë zbuluar pas krahasimit të regjistrave aktualë me regjistrat e skanuar vite më parë, ku janë konstatuar mospërputhje me origjinalët. Prokuroria po vijon verifikimin e regjistrave të sekuestruar për të evidentuar raste të tjera të mundshme falsifikimi apo tjetërsimi të pronave ndër vite.
Prokurorët Mediana Metaj dhe Anton Pali kanë kërkuar masa sigurimi për 12 persona nën hetim, kërkesë që është pranuar nga gjyqtari Xhevdet Lika.
Për ish-drejtorin e ASHK Durrës, Adrian Kona, është caktuar masa “arrest në burg” për “falsifikim dokumentesh” dhe “shpërdorim detyre”.
E njëjta masë është caktuar edhe për nëpunësit Bledar Zerba dhe Rovin Zeqja. Për zyrtarët Jonida Mergeja, Artur Çobani dhe Leandro Dervishi, të dyshuar për “shpërdorim detyre”, është caktuar masa “detyrim paraqitje”.
Në “arrest në burg” është lënë edhe Ramazan Sheshi, i dyshuar për “mashtrim”, “falsifikim dokumentesh” dhe “pastrim të produkteve të veprës penale”.
Ndërsa Shaqir Sheshi, Viktor Mataj, Arianit Mataj dhe Besnik Xhafa, të dyshuar për “falsifikim dokumentesh” dhe “mashtrim”, janë lënë në “arrest shtëpie”.
Për Fiqirete Xhafën, e dyshuar edhe për pastrim parash, është caktuar masa “detyrim paraqitje”.
Ky hetim vjen pak ditë pasi SPAK përmbylli hetimet ndaj Aleksandër Lahos, i njohur si Rrumi, vëllait të tij Vullnet Muça dhe gjashtë të pandehurve të tjerë, të akuzuar për një skemë të gjerë falsifikimi pronash nga Shijaku deri te Kepi i Rodonit, me vlerë të llogaritur rreth 16 milionë euro.
