Nga përmirësimi i përqendrimit deri te rritja e krijimtarisë, vallëzimi ofron një sërë përfitimesh për trurin. Dhe nuk është e nevojshme të kaloni orë të tëra duke kërcyer për t’i ndier këto efekte.
Jam në zyrën time, duke qëndruar përpara laptopit dhe duke lëvizur paksa në mënyrë të ngathët nën ritmet e një liste këngësh verore. Është ora 13:00 dhe jam në punë, por kjo nuk është thjesht teknika ime më e fundit për të shtyrë punën. Unë po kërcej për të mirën e trurit tim.
Ka pafund këshilla se sa dhe kur duhet të ushtrohemi dhe shpesh kjo paraqitet si një çështje serioze. Por ndjekja e teknikave të caktuara ose shqetësimi për mënyrën e saktë të ushtrimeve mund t’ia heqë kënaqësinë aktivitetit fizik ose, edhe më keq, të na bëjë ta shtyjmë atë. Është shumë e lehtë të kalojmë pothuajse gjithë ditën pa lëvizur.
Prandaj, kur kolegu im më tha se vallëzimi mund të ketë shumë efekte pozitive në humorin dhe trurin tonë, vendosa ta provoja vetë për të parë nëse mund t’i përjetoja këto përfitime më rregullisht.
Për këtë arsye, i vura vetes sfidën që të bëja një pushim pesëminutësh për të kërcyer çdo ditë gjatë një jave, për të parë nëse do të vëreja ndonjë ndryshim në humorin dhe produktivitetin tim.
Ditën e parë u ndjeva paksa çuditshëm duke kërcyer vetëm, në mes të ditës së punës. Megjithatë, kur u ula përsëri në tavolinën time, u ndjeva më energjik në një kohë të ditës kur zakonisht ndihem paksa i plogësht. Për habinë time, kjo ishte një përvojë aq e këndshme sa do të kisha vazhduar me dëshirë edhe më gjatë.
Ajo që përjetova mbështetet edhe nga prova shkencore. Vallëzimi ofron një kombinim unik përfitimesh fizike, njohëse (kognitive) dhe shoqërore, që e dallojnë atë nga format e tjera të ushtrimeve fizike. Madje, edhe vetëm pesë minuta vallëzim, siç e zbulova vetë, sjellin shumë përfitime për shëndetin tonë, veçanërisht për shëndetin e trurit.
