Agjencia për Zhvillim Bujqësor dhe Rural ka publikuar listat e aplikimeve të kualifikuara për masat mbështetëse në blegtori dhe bletari, në kuadër të Skemës Kombëtare të Mbështetjes në Bujqësi 2026.
Sipas AZHBR-së, për masat 1–4 janë kualifikuar gjithsej 21 179 aplikime, të cilat përfitojnë mbështetje për zhvillimin e tufave të matrikulluara, bletarisë dhe mbarështimit të derrave.
Për Masën 1, që lidhet me tufën bazë të matrikulluar të lopëve dhe mëshqerrave, janë kualifikuar 6 661 aplikime.
Për Masën 2, për tufën bazë të matrikulluar të të imtave, janë kualifikuar 7 234 aplikime, ndërsa për Masën 3, që mbështet mbarështimin e bletarisë, janë kualifikuar 7 015 aplikime.
Për Masën 4, për mbarështimin e dosave dhe paradosave, janë kualifikuar 269 aplikime.
Fermerët aplikues ftohen të verifikojnë statusin e tyre dhe të plotësojnë dokumentacionin e kërkuar pranë Agropikave brenda 20 ditësh nga publikimi i listave.
Ndërkohë, vijon edhe procesi i aplikimit për përfitimin e kompensimit 10% përmes autofaturës. Sipas administratës tatimore, deri tani janë dorëzuar 1 265 aplikime, me një vlerë totale të kompensimit të kërkuar prej 3.5 milionë eurosh.
Skema ka hyrë në fuqi më 1 korrik 2026 dhe synon të lehtësojë formalizimin e transaksioneve të fermerëve, të thjeshtojë procedurat dhe të rrisë mbështetjen financiare për aktivitetin e tyre.
