Facebook, TikTok, Instagram dhe platformat e tjera të huaja që ofrojnë shërbime për përdoruesit shqiptarë pritet të marrin përgjegjësi të drejtpërdrejtë ligjore në Shqipëri.
Projektligji i ri “Për shërbimet digjitale” parashikon që rregullat shqiptare të zbatohen pavarësisht se ku ndodhet selia e kompanisë.
Platformat që nuk kanë seli në vend do të detyrohen të caktojnë një përfaqësues ligjor në Shqipëri ose në një shtet të Bashkimit Evropian. Përfaqësuesi do të shërbejë si kontakti zyrtar me autoritetet shqiptare dhe do të mbajë përgjegjësi për mosrespektimin e ligjit, krahas vetë kompanisë.
Ndryshime të rëndësishme parashikohen edhe në mënyrën se si platformat përdorin algoritmet për sugjerimin e videove, postimeve, produkteve apo profileve.
Ato duhet t’u shpjegojnë përdoruesve parametrat kryesorë mbi të cilët bazohen rekomandimet dhe arsyen pse u shfaqet një përmbajtje e caktuar.
Përdoruesve duhet t’u ofrohet të paktën një mundësi rekomandimi që nuk mbështetet në profilizimin e të dhënave të tyre.
Rregulla më të forta do të zbatohen për të miturit, të cilët konsiderohen kategori që kërkon mbrojtje të posaçme. Platformat do të ndalohen të profilizojnë fëmijët për t’u shfaqur reklama ose për t’u rekomanduar përmbajtje të personalizuara.
Ato duhet të përshtatin sistemet e rekomandimit, reklamat dhe ndërfaqet për të shmangur praktikat manipuluese ose të dëmshme ndaj të miturve.
Projektligji kërkon gjithashtu nivele më të larta privatësie dhe sigurie, si dhe masa të tilla si kontrolli prindëror dhe verifikimi i moshës.
Platformat duhet të krijojnë edhe pika kontakti që u mundësojnë përdoruesve shqiptarë të komunikojnë drejtpërdrejt me to dhe jo vetëm përmes sistemeve të automatizuara.
Nisma synon të rrisë transparencën dhe llogaridhënien e kompanive teknologjike për moderimin e përmbajtjeve, pezullimin e llogarive dhe funksionimin e algoritmeve. Projektligji përafron pjesërisht legjislacionin shqiptar me Aktin e Shërbimeve Digjitale të Bashkimit Evropian.
