Shkaku i aksidentit të rëndë pranë rrethrrotullimit të TEG-ut, ku humbën jetën dy punonjës egjiptianë të kompanisë “Alba Beton”, vazhdon të mbetet i paqartë.
Hetimi po zhvillohet kryesisht në dy drejtime: mundësia e një defekti të rëndë në sistemin e frenimit dhe ajo e një shqetësimi të menjëhershëm shëndetësor të drejtuesit të mjetit.
Nga rindërtimi paraprak i ngjarjes rezulton se pompa e betonit ka mbërritur me shpejtësi në rrethrrotullim ku nuk duken shenja tentative frenimi.
Mjeti i rëndë goditi fillimisht një automjet “Audi”, më pas kaloi barrierat mbrojtëse dhe ra në pjesën e poshtme të rrugës, ku u përplas me murin anësor.
Drejtuesi 28-vjeçar i automjetit të goditur shpëtoi pavarësisht dëmtimit të plotë të makinës dhe aktualisht ndodhet jashtë rrezikut për jetën.
Pasojat mund të kishin qenë shumë më të rënda nëse në trajektoren e pakontrolluar të kamionit do të ndodhej një autobus, një furgon pasagjerësh apo një mjet me disa persona brenda.
Ende nuk ka një përfundim zyrtar nëse kamioni kishte probleme teknike apo nëse drejtuesi humbi aftësinë për të reaguar për shkak të gjendjes shëndetësore.
Për sqarimin e plotë të dinamikës priten rezultatet e kontrollit teknik të mjetit dhe të ekspertizës mjekoligjore.
Pikëpyetjet rreth ngjarjes u shtuan edhe pas reagimit të DPSHTRR-së, e cila bëri të ditur se shtetasit egjiptianë nuk rezultonin të pajisur me leje drejtimi shqiptare dhe as me Dëshmi Aftësie Profesionale për profilin “Automakinist”.
Ky dokument kërkohet për drejtimin e mjeteve të posaçme, ku përfshihen edhe kamionët e pajisur me pompë betoni.
DPSHTRR sqaroi se të huajt mund të drejtojnë në Shqipëri me dokumentacion të vlefshëm të lëshuar nga vendi i tyre, ndaj mungesa e patentës shqiptare nuk provon vetvetiu se drejtuesi ishte pa leje.
Megjithatë, Shqipëria nuk ka marrëveshje me Egjiptin për njohjen dhe konvertimin e lejeve të drejtimit, ndërsa mbetet për t’u verifikuar çfarë dokumentesh kishte paraqitur punonjësi pranë kompanisë.
Ngjarja ngre shqetësime serioze për mënyrën se si kontrollohen patentat, kualifikimet profesionale dhe përvoja e punonjësve të huaj përpara se t’u besohet përdorimi i mjeteve të rënda.
Hetimi duhet të përcaktojë jo vetëm shkakun teknik ose shëndetësor të aksidentit, por edhe nëse punësimi dhe ngarkimi me këtë detyrë janë kryer në përputhje me kërkesat ligjore dhe standardet e sigurisë.
