Administrata e presidentit amerikan Donald Trump ka shpallur një paketë të re tarifash doganore që prek rreth 60 partnerë tregtarë, mes tyre edhe Bashkimin Evropian. Masat e reja parashikojnë tarifa shtesë prej 10% dhe 12.5% për një sërë importesh, me argumentin se synojnë të frenojnë hyrjen në tregun amerikan të produkteve të prodhuara me punë të detyruar.
Sipas autoriteteve amerikane, tarifat do të mbështeten në një bazë të re ligjore pas vendimeve të mëparshme të gjykatave që rrëzuan disa nga masat e administratës Trump. Për importet nga Bashkimi Evropian, Kanadaja, Meksika, Britania e Madhe dhe disa vende të tjera është propozuar një tarifë prej 10%, ndërsa për pjesën tjetër të vendeve të përfshira në paketë parashikohet një tarifë prej 12.5%.
Lëvizja vjen në vazhdën e politikës tregtare të administratës amerikane, e cila javët e fundit ka vendosur edhe tarifa të veçanta ndaj importeve nga Brazili dhe Kanadaja. Ndërkohë, zyrtarë të administratës kanë paralajmëruar se mund të pasojnë masa të tjera nëse hetimet tregtare në zhvillim evidentojnë praktika të padrejta nga partnerët tregtarë të SHBA-së.
Vendimi pritet të ndikojë në marrëdhëniet tregtare mes Shteteve të Bashkuara dhe partnerëve të saj kryesorë, ndërsa Bashkimi Evropian dhe vendet e tjera të prekura pritet të shqyrtojnë hapat që do të ndërmarrin si përgjigje ndaj tarifave të reja.
