Kreu i ”SK Group” i Koresë së Jugut, kompania mëmë e gjigantit të gjysmëpërçuesve ”SK hynix”, u urdhërua të paguajë 944 miliardë von (566 milionë euro) ish-bashkëshortes së tij për të zgjidhur atë që media e vendit e ka quajtur “divorci i shekullit”.
Ky episod i fundit në një sagë ligjore shumëvjeçare bëri që Gjykata e Lartë e Seulit, e detyruar ta bënte këtë nga Gjykata Supreme, të rrëzonte një vendim të vitit 2024 që i kishte dhënë 1,38 trilion von (830 milionë euro) paditëses Roh Soh-yeong pas divorcit të saj nga CEO i ”SK Group”, Chey Tae-won.
Gjykata e Lartë vendosi që Roh kishte të drejtë, pas ndarjes së aseteve të çiftit, për një shumë parash ekuivalente me një të tretën e aksioneve të ”SK Group” të mbajtura nga Chey.
“Kontributi i të pandehurit u rrit ndjeshëm gjatë martesës”, shkroi gjykata në vendimin e saj.
“Paditësja kontribuoi në këtë rritje përmes punës së saj në shtëpi, kujdesit për fëmijët dhe aktiviteteve publike që lidhen me ‘SK Group”, thuhej në vendim.
Çifti u martua në vitin 1988 në Shtëpinë Blu, pallatin presidencial në Seul ku shërbente atëherë babai i nuses, presidenti Roh Tae-woo, dhe pati tre fëmijë.
Megjithatë, ata kishin jetuar të ndarë për rreth 15 vjet dhe në vitin 2015, Chey pranoi se kishte lindur një fëmijë jashtë martese.
Në zemër të mosmarrëveshjes, e cila është zvarritur nga gjykata në gjykatë që nga viti 2022, qëndron rritja dramatike e vlerës së ”SK Group” në vitet e fundit, e nxitur nga bumi global i inteligjencës artificiale, ku ”SK hynix” është një lojtar i rëndësishëm.
Që kur Chey pranoi lidhjen e tij jashtëmartesore në vitin 2015, aksionet e ”SK Group” janë më shumë se trefishuar.
“Gjykata mori parasysh rritjen e ndjeshme të vlerës së aksioneve të të paditurit kur përcaktoi raportin e ndarjes së pronës”, thuhej në vendimin e lexuar të premten, pa dhënë detaje të mëtejshme.
Roh ka marrë tashmë pension ushqimor nga ish-bashkëshorti i saj në një procedurë të veçantë, në formën e një pagese të vetme prej dy miliardë vonësh (1,2 milionë euro).
