Këtë të hënë ka nisur viti i ri akademik 2025-2026 në të gjitha universitetet publike dhe private të vendit. Auditorët janë hapur për mijëra studentë të rinj, ndonëse shifrat paraprake të regjistrimeve konfirmojnë një rënie të vazhdueshme.
Sipas të dhënave nga sistemi qendror i aplikimeve në arsimin e lartë, deri në përfundim të raundit të dytë pritet që numri i studentëve të rinj të regjistruar të shkojë në rreth 20 mijë, ndërsa pas përfundimit të raundit të tretë, që zhvillohet nga 13 deri më 24 tetor, shifra përfundimtare parashikohet të arrijë në rreth 22 mijë studentë.
Krahasuar me vitin e kaluar, ku numri i regjistrimeve për herë të parë ishte afro 24.500, bëhet fjalë për një rënie me mbi 10%, ndërsa në raport me pesë vite më parë, kur universitetet regjistronin mbi 30 mijë studentë të rinj, tendenca negative duket edhe më e theksuar.
Në mesin e kësaj rënieje të përgjithshme, disa programe studimi vijojnë të ruajnë interes të lartë nga maturantët. Degët e lidhura me shëndetësinë si Mjekësia e Përgjithshme, Infermieria, Stomatologjia dhe Farmacia mbeten ndër më të preferuarat, të ndjekura nga teknologjia e informacionit dhe inxhinieritë.
Në të kundërt, fusha si shkencat sociale, ekonomia dhe veçanërisht programet e mësuesisë po përballen me një rënie të qëndrueshme të regjistrimeve, çka mund të krijojë boshllëqe në tregun e punës në vitet në vijim.
Sipas statistikave zyrtare, mbi 50% e maturantëve të këtij viti kanë zgjedhur programe në fushën e shëndetësisë dhe teknologjisë, duke reflektuar qartë orientimin drejt profesioneve që ofrojnë më shumë siguri dhe mundësi punësimi, si brenda ashtu edhe jashtë vendit.
Aktualisht po zhvillohet raundi i dytë i regjistrimeve, i cili përfundon më 8 tetor, ndërsa raundi i tretë dhe i fundit do të vijojë deri më 24 tetor, me qëllim plotësimin e vendeve të mbetura bosh.
Ndërkohë, universitetet shqiptare po tentojnë të rrisin tërheqjen e studentëve përmes programeve të përbashkëta ndërkombëtare, mësimit në dy gjuhë, si dhe bashkëpunimeve me universitete të huaja. Këto përpjekje janë pjesë e procesit të ndërkombëtarizimit të arsimit të lartë në vend, me synimin për të përmirësuar cilësinë dhe për ta bërë sistemin më konkurrues në rajon.
Megjithë këto zhvillime pozitive në drejtim të cilësisë, sfida më e madhe mbetet rënia e numrit të studentëve. Ky fenomen lidhet ngushtë me uljen e numrit të maturantëve, rritjen e emigracionit të të rinjve dhe orientimin në rritje drejt studimeve jashtë vendit, sidomos në vendet e Bashkimit Evropian. /Skyweb.al
