Sektori i akomodimit dhe hotelerisë në vend po shkon gjithnjë e më shumë drejt formalizimit, ku jo vetëm turistët e huaj, por edhe një pjesë e konsiderueshme e shtetasve shqiptarë po preferojnë pagesat me kartë krediti apo debiti.
Ky tranzicion drejt ekonomisë digjitale ka nxjerrë në pah një problematikë për stafet e shërbimit, pamundësinë për të marrë shpërblime ose bakshishe në mungesë të parave cash.
“Problemi qëndron tek pagesat me kartë, që sot për sot pothuajse të gjithë të huajt e bëjnë, por që edhe shqiptarët… marrin pagat apo pensionet nëpërmjet kartave të kreditit. Duke qenë se punonjësit e turizmit, në momentin kur pagesat do të bëhen me kartë, nuk kanë mundësi të kenë kontakt me paranë fizike, një nga elementët e rëndësishëm është dhe pagesa ‘tips’, pra shpërblimi. I cili nuk është i detyrueshëm, por është një mesatare rreth 10% që lihet në vende të ndryshme të botës dhe të Evropës,” shprehet Zak Topuzi, Kreu i Shoqatës së Operatorëve Turistikë.
Si model po merret rajoni, ku sipas topuzit, Kroacia e ka avancuar këtë skemë duke lejuar që punonjësit të marrin deri në 3,600 euro në vit neto nga bakshishet elektronike, tërësisht pa taksa.
“Kemi biseduar me të gjitha instancat, ministritë përkatëse, Shoqata e Bankave, që është pothuajse e gatshme, pasi sistemi i atyre bankave të huaja e kanë këtë program dhe nuk kërkon ndonjë ndryshim të madh ligjor… Është një proces i cili ndihmon dhe formalizimin e tregut, ndihmon dhe punonjësit që të kenë mundësi të shpërblehen dhe them se është në fazën e fundit të diskutimeve.”
Ndryshimet e reja teknologjike pritet të zbatohen pa pasur nevojë për përmbysje të mëdha ligjore, duke shfrytëzuar sistemet ekzistuese bankare. Përmes kësaj nisme, operatorët turistikë synojnë jo vetëm të rrisin transparencën, por mbi të gjitha të ruajnë dhe të joshin stafin e kualifikuar, që mbetet sfida kryesore e tregut të punës në vend./scan
