Një birrë e ftohtë në plazh apo një koktej gjatë drekës mund të duket pjesë normale e verës, por konsumimi i alkoolit gjatë ditës ka disa efekte që mund të jenë më të forta se sa mendohet.
Ekspertët paralajmërojnë se kombinimi i alkoolit me vapën, ekspozimin në diell dhe mungesën e ushqimit mund të përshpejtojë dehidratimin dhe dehjen.
Psikiatri Akhil Anand, nga Cleveland Clinic, shpjegon se gjatë ditës njerëzit kanë më pak “sinjale” që i bëjnë të ndalojnë së piri, ndryshe nga mbrëmja kur vakti apo afrimi i orës së gjumit kufizon natyrshëm konsumimin.
Një tjetër problem është se pirja gjatë ditës shpesh shoqërohet me vakte të çrregullta ose me stomak bosh.
Në këto kushte, alkooli përthithet më shpejt dhe dehja mund të vijë më herët dhe të jetë më intensive.
Vapa e verës e shton problemin. Djersitja largon lëngje, natrium dhe minerale, ndërsa alkooli vepron si diuretik dhe shton humbjen e lëngjeve.
Sipas Sarah Andrews, nga Johns Hopkins Medicine, dehidratimi mund të përkeqësojë lodhjen, marramendjen, të përzierat dhe ndjesinë e çorientimit.
Kjo është edhe arsyeja pse një gotë që duket “e lehtë” në mesditë mund të shoqërohet me dhimbje koke dhe tharje të gojës që në orët e pasdites.
Danesh Alam, specialist i varësive në Northwestern Medicine, paralajmëron se një drekë me alkool mund të përfundojë me simptoma të plota të hangover-it para darkës.
Ekspertët këshillojnë të pihet ujë paralelisht me alkoolin, të konsumohet ushqim dhe të shmangen pijet me shumë sheqer.
Efektet nuk janë vetëm fizike.
Dehidratimi, rrahjet e shpejta të zemrës, marramendja apo dridhjet e lehta mund të interpretohen nga truri si shenja rreziku, duke shkaktuar nervozizëm dhe ankth.
Ky fenomen njihet shpesh si “hang-xiety”, kombinim i hangover-it me ankthin, dhe mund të jetë më i fortë pas konsumimit të alkoolit gjatë ditës.
Edhe ideja se pirja herët nuk ndikon te gjumi është e gabuar.
Alkooli gjatë pasdites mund të shkaktojë përgjumje të hershme, të prishë ritmin cirkadian dhe më pas të vështirësojë gjumin gjatë natës.
Edhe kur personi nuk fle pasdite, metabolizimi i alkoolit mund të sjellë zgjime të papritura gjatë natës.
Ekspertët rekomandojnë që mes pijes së fundit alkoolike dhe gjumit të ketë të paktën tre deri në katër orë.
Uji, ushqimi dhe kufizimi i sasisë mbeten mënyra më e mirë për të reduktuar efektet e alkoolit, sidomos në ditët e nxehta të verës. /skyweb.al
