Ministria e Drejtësisë nuk e ka dorëzuar ende pranë autoriteteve franceze dokumentacionin për ekstradimin në Shqipëri të biznesmenit Ermal Beqiri.
Ndonëse sëfundmi është raportuar se kërkesa ishte përcjellë, dokumentet vazhdojnë të jenë në proces përgatitjeje nga ministria e drejtuar nga Toni Gogu. Sipas gazetares së Top Channel, Anila Hoxha, Ministria e Drejtësisë është ende duke përkthyer materialet që do t’u dërgohen organeve franceze.
Dosja përfshin vendimin e Gjykatës së Posaçme të dhjetorit 2025, me të cilin ndaj Beqirit është caktuar masa e sigurisë “arrest në burg”, si edhe akte të fashikullit hetimor.
Ministria shprehet se shkak për vonesën mësohet se është bërë volumi i madh i dokumentacionit, përkthimi dhe përgatitja e të cilit kërkon edhe disa ditë të tjera.
Ermal Beqiri kërkohet në Shqipëri në kuadër të hetimeve për tenderët e Agjencisë Kombëtare të Shoqërisë së Informacionit.
Ai dyshohet për “Konkurrencë të paligjshme nëpërmjet dhunës” dhe “Heqje të paligjshme të lirisë”.
Ndaj tij rëndon edhe akuza për “Shkelje të barazisë së pjesëmarrësve në tenderë apo ankande publike”, e kryer në formën e grupit të strukturuar kriminal.
Beqiri dyshohet gjithashtu për “Grup të strukturuar kriminal”, “Kryerje të veprave penale nga organizata kriminale dhe grupi i strukturuar kriminal” dhe “Pastrim të produkteve të veprës penale ose veprimtarisë kriminale”.
Akuza e shtatë është “Korrupsioni aktiv i personave që ushtrojnë funksione publike”, e kryer në bashkëpunim dhe më shumë se një herë. Në dosjen e AKSHI-t ndaj tij është caktuar masa “arrest në burg”.
Ndërkohë SPAK po përgatit edhe një kërkesë të dytë për ndihmë juridike drejtuar Francës.
Përmes saj pritet të kërkohet sekuestrimi i pasurive që dyshohet se i përkasin Beqirit, mes të cilave një kështjellë, dy banesa, avionë dhe automjete.
SPAK ka njoftuar më herët se në Francë janë identifikuar një kështjellë me vlerë rreth 2.6 milionë euro, dy apartamente, llogari bankare me mbi 2 milionë euro dhe mjete motorike, për të cilat dyshohet se kanë origjinë kriminale.
Dorëzimi i plotë i dokumentacionit do t’u hapë rrugë autoriteteve franceze të shqyrtojnë zyrtarisht kërkesën për ekstradimin e Ermal Beqirit në Shqipëri, por duket se Ministria e Drejtësisë ka punë të tjera, ose…. nuk e do Ermal Beqirin në Shqipëri. /skyweb.al
