Sipas informacioneve paraprake, grabitësit kanë hyrë në bankë të armatosur dhe kanë kërcënuar punonjësit. Në momentin e mbërritjes së forcave të rendit, ata janë mbyllur brenda ambienteve të bankës, duke e kthyer situatën në një operacion të tensionuar.
Dëshmitarët raportojnë se një nga autorët ka hyrë me helmetë në kokë dhe armë në dorë, pasi kishte zbritur nga një motor i drejtuar nga një bashkëpunëtor. Dyshohet se brenda bankës mund të ketë edhe pengje, ndërsa grabitësit mendohet të jenë të armatosur.
Në vendngjarje kanë mbërritur forcat speciale të ndërhyrjes së shpejtë, ndërsa e gjithë zona është vendosur nën kontroll të rreptë. Policia ka rrethuar ndërtesën dhe po monitoron edhe ambientet përreth, për të parandaluar çdo tentativë arratisjeje përmes rrugëve alternative.
Autoritetet nuk përjashtojnë mundësinë e një ndërhyrjeje të menjëhershme për neutralizimin e autorëve, ndërsa operacioni vijon në kushte tensioni të lartë.
