Transporti urban i kthehet normalitetit pas dy ditësh tension dhe presioni nga operatorët privatë.
Autoritetet shtetërore nuk u tërhoqën përballë asaj që në qarqe të ngushta po cilësohet si përpjekje për shantazh, duke u kujtuar kompanive detyrimet kontraktuale për ofrimin e shërbimit publik.
Burime bëjnë me dije se ndërhyrja e institucioneve ka qenë e drejtpërdrejtë, me kërkesë të qartë për rikthimin e menjëhershëm të linjave në funksionim.
Kjo ka sjellë edhe dakordësinë për rifillimin e transportit me kapacitet të plotë që nga sot.
Pas një takimi që nisi në orët e para të mëngjesit mes përfaqësuesve të qeverisë dhe operatorëve, u arrit një marrëveshje paraprake verbale që shërbimi të vijojë normalisht, ndërsa çështja e subvencioneve për naftën mbetet ende në diskutim.
Operatorët pritet të përfitojnë mbështetje financiare për litër karburanti, por vlera konkrete nuk është përcaktuar dhe do të negociohet në ditët në vijim.
Palët kanë rënë dakord që të zhvillojnë një tjetër takim javën e ardhshme për të diskutuar kërkesa të tjera ekonomike, përfshirë TVSH-në, akcizën dhe kategoritë që përfitojnë transport falas.
Një gjë duket e qartë: Këtë herë presioni dyditor nuk solli tërheqje nga shteti, ndërsa shërbimi për qytetarët rikthehet në normalitet.
