Qeveria ka përgatitur një projektvendim të ri që forcon rregullat për trajtimin e ndërtesave dhe materialeve që përmbajnë asbest, me synim mbrojtjen e shëndetit publik dhe reduktimin e ndotjes së mjedisit.
Sipas projektvendimit, çdo person fizik ose juridik që kryen punime për prishjen, shembjen apo çmontimin e godinave, strukturave ose instalimeve që përmbajnë asbest do të jetë i detyruar të marrë masa për të parandaluar çlirimin e fibrave dhe pluhurit të asbestit në ajër.
Përpara nisjes së punimeve, subjektet duhet të hartojnë një plan pune me masat parandaluese që do të zbatohen gjatë heqjes së materialeve me asbest, në përputhje me legjislacionin për mbrojtjen e punëmarrësve.
Projektvendimi parashikon gjithashtu që mbetjet e asbestit të konsiderohen mbetje të rrezikshme dhe të transportohen, paketohen e depozitohen në mënyrë që të mos çlirojnë fibra në mjedis. Këto veprimtari do të mund të kryhen vetëm nga subjekte të pajisura me lejet përkatëse mjedisore.
Sipas relacionit shoqërues, masat e reja vijnë pasi asbesti është përdorur gjerësisht në Shqipëri gjatë viteve 1930–1990 dhe vazhdon të jetë i pranishëm në shumë ndërtesa e materiale ndërtimi, duke kërkuar rregulla më të forta për trajtimin e tij. /skyweb.al
