Fondi amerikan Apollo Global Management ka arritur marrëveshjen për blerjen e kompanisë ajrore easyJet, në një transaksion që e vlerëson transportuesin britanik me kosto të ulët në 5.7 miliardë paund, ose rreth 6.7 miliardë euro.
Marrëveshja parashikon pagesën e 715 pensave për çdo aksion të easyJet dhe është rekomanduar unanimisht nga bordi drejtues i kompanisë. Oferta përfaqëson një prim prej 81% krahasuar me çmimin e aksioneve përpara se interesi për blerjen të bëhej publik.
Njoftimi i sotëm shënon përfundimin e një gare disa mujore për kontrollin e easyJet. Fondi rival Castlelake, i cili kishte paraqitur disa oferta të njëpasnjëshme, është tërhequr dhe ka deklaruar se nuk do të paraqesë ofertë përfundimtare.
Familja e themeluesit të easyJet, Stelios Haji-Ioannou, dhe aksionarë të tjerë që zgjedhin të riinvestojnë pritet të zotërojnë nga 45.1% deri në 49.9% të kapitalit të kompanisë që do të realizojë blerjen.
Kjo strukturë lidhet me kërkesat europiane për pronësinë dhe kontrollin e kompanive ajrore, pasi easyJet duhet të mbetet në shumicë e zotëruar dhe kontrolluar nga interesa të Bashkimit Europian për të ruajtur të drejtat e fluturimeve brenda tregut europian.
Marrëveshja pritet të përfundojë deri në mars 2027, pas marrjes së miratimeve të nevojshme. Deri atëherë, easyJet vijon të operojë normalisht. /skyweb.al
