Shoqëria Rajonale Ujësjellës Kanalizime Durrës ka reaguar pas pamjeve të ujit të errët të konstatuar në zonën e plazhit pranë Hidrovorit Hamallaj.
Sipas njoftimit zyrtar, hidrovori ndodhet rreth 1 kilometër larg vijës bregdetare dhe në momentin e verifikimeve ka qenë i mbyllur, pa shkarkime aktive drejt detit.
Ujësjellësi sqaron se ngjyra e errët është shkaktuar nga balta, llumrat dhe sedimentet e akumuluara në kanal, të cilat janë trazuar dhe transportuar drejt bregdetit nga lëvizja e ujit.
Sipas institucionit, erërat e forta dhe dallgëzimi i ditëve të fundit kanë mundësuar depërtimin e ujit në brendësi të kanalit, duke ngritur sedimentet dhe duke i çuar drejt detit.
SHRUKD thekson se nga kontrollet në terren nuk është konstatuar prani e ujërave të zeza në zonën ku u shfaq ngjyrosja.
Po sipas njoftimit, rezidencat e zonës janë të lidhura me rrjetin e kanalizimeve dhe ujërat e ndotura përcillen drejt Impiantit të Trajtimit në Lalëz.
Impianti, sipas Ujësjellësit, funksionon 24 orë në 24 dhe ujërat trajtohen përpara se të shkarkohen në det.
Institucioni bën me dije se monitorimi i zonës do të vijojë dhe se do të merren masa nëse situata përsëritet. /skyweb.al
