Shqipëria po paguan gjithnjë e më shumë për mishin e importuar, edhe kur sasia nuk është në nivele rekord. Në gusht 2026, importet e grupit “Mish dhe të brendshmet e ngrënshme të mishit” arritën në rreth 939 milionë lekë, duke shënuar vlerën e dytë më të lartë mujore që prej vitit 2005.
Rekordi mbetet korriku 2025, kur fatura arriti në rreth 950 milionë lekë. Gushti i këtij viti ishte vetëm rreth 1.2% poshtë atij niveli, megjithëse në sasi nuk u afrua rekordit historik.
Në gusht u importuan rreth 4,280 tonë mish, 21.1% më shumë se në të njëjtin muaj të vitit të kaluar. Por vlera e importeve u rrit shumë më shpejt, me 35.5%, nga 693 milionë në 939 milionë lekë.
Kjo diferencë reflektohet edhe te vlera mesatare e importit. Nga rreth 196 lekë për kilogram në gusht 2025, ajo u ngjit në afro 219 lekë/kg këtë gusht, ose rreth 11.8% më shumë.
Edhe krahasimi me korrikun 2026 është domethënës. Sasia e importuar ra me afro 3%, ndërsa fatura u rrit me mbi 19%. Vlera mesatare për kilogram u rrit kështu nga rreth 178 në 219 lekë vetëm brenda një muaji.
Në tetë muajt e parë të vitit, Shqipëria importoi rreth 32.4 mijë tonë mish, 6.8% më shumë se një vit më parë, ndërsa fatura u rrit me 13.1%, në mbi 6 miliardë lekë.
Shifrat sugjerojnë se rritja e kostos së importeve nuk shpjegohet vetëm nga sasia. Megjithatë, vlera për kilogram nuk është domosdoshmërisht e barabartë me çmimin e të njëjtit produkt, pasi mund të ndikohet edhe nga ndryshimi i llojeve të mishit dhe vendeve të origjinës.
Në fillim të këtij muaji Shqipëria ndaloi importet e mishit nga Brazili, një masë e kërkuar nga BE. Shteti latin mbulonte një të tretën e tregut shqiptare të mishit, ndërsa zëvendësimi i tij me tregje të tjera mund të sjellë kosto më të larta për konsumatorët në vendin tonë.
tvscan.al
