Prokuroria e Tiranës ka thirrur drejtuesen e Korporatës Shqiptare të Investimeve, Elira Kokona, për ta marrë në pyetje në lidhje me një kallëzim të depozituar ndaj saj. Sipas raportimeve, ajo do të pyetet në cilësinë e personit që ka dijeni për rrethanat e çështjes.
Kallëzimi është paraqitur nga biznesmeni Thanas Biqiku, ndërsa në kuadër të këtij procedimi pritet të merren në pyetje edhe disa persona të tjerë. Mes tyre janë përmendur Enkelejd Musabelliu, Kastriot Gurra, Enkelejda Muça dhe Ermal Nufi, i cili mban detyrën e zëvendës-shefit të kabinetit të kryeministrit Edi Rama.
Emri i Elira Kokonës është përmendur gjithashtu në raportime që lidhen me projektin “Durana Tech Park”.
Ky park teknologjik u krijua nën pronësinë e Korporatës Shqiptare të Investimeve, institucioni që ajo drejton. Sipas dokumenteve dhe raportimeve mediatike, projekti nuk ka ndërtuar deri më tani struktura fizike dhe funksionon në formë virtuale, ndërkohë që për të janë dhënë tenderë dhe lehtësira fiskale.
EKSKLUZIVE / Skandali AKSHI, SPAK shtrin hetimet edhe te DURANA Tech Park
Çështja ka marrë vëmendje edhe për shkak të elementeve të tjera të përmendura në raportime, ku flitet për regjistrimin e kompanive përfituese të përjashtimeve tatimore dhe lehtësimeve doganore. Sipas këtyre burimeve, mes përfituesve janë përfshirë jo vetëm start-up-e, por edhe biznese të konsoliduara, si dhe individë të përmendur në procedime të ndryshme hetimore.
Hetimet pritet të vijojnë me marrjen e deklarimeve dhe verifikimin e dokumentacionit përkatës, ndërsa Prokuroria e Tiranës nuk ka dhënë ende një qëndrim zyrtar për përfundimet e mundshme të procedimit.
