Për dekada, nxirja në diell u konsiderua simbol i shëndetit dhe mirëqenies. Por sot dihet se ekspozimi i tepërt ndaj rrezeve ultraviolet rrit rrezikun e kancerit të lëkurës. Megjithatë, kjo nuk do të thotë se duhet ta shmangim plotësisht diellin, shkruan BBC.
Ekspozimi i moderuar në diell ndihmon organizmin të prodhojë vitaminë D, e rëndësishme për kockat, muskujt dhe sistemin imunitar. Drita e diellit lidhet gjithashtu me përmirësimin e humorit, gjumit, funksioneve njohëse dhe shëndetit të zemrës. Rrezet UVA mund të nxisin çlirimin e oksidit nitrik, duke ndihmuar në zgjerimin e enëve të gjakut dhe uljen e presionit të gjakut.
Ekspertët rekomandojnë ekspozime të shkurtra dhe të rregullta, në vend të qëndrimit të gjatë në diell. Për personat me lëkurë të çelët, disa minuta ekspozim në duar, krahë ose këmbë, në shumicën e ditëve të javës, mund të mjaftojnë për prodhimin e vitaminës D. Ekspozimi është më efektiv rreth mesditës, kur rrezet UVB janë më të forta, por në zonat me rrezatim shumë të lartë mund të preferohet paraditja ose pasditja.
Personat me lëkurë më të errët mund të kenë nevojë për më shumë kohë në diell, pasi melanina e lartë e ngadalëson prodhimin e vitaminës D. Një studim në Britani sugjeron se në pranverë dhe verë mund të nevojiten rreth 25 minuta ekspozim në mesditë për personat me lëkurë kafe të errët.
Megjithatë, më shumë diell nuk do të thotë më shumë shëndet. Djegia e lëkurës dhe ekspozimi i zgjatur ndaj rrezeve UV rrisin rrezikun e dëmtimeve të lëkurës dhe kancerit. Prandaj, qëllimi është një ekuilibër: pak diell i rregullt, duke shmangur djegien dhe ekspozimin e tepërt. /skyweb.al
