Disa pasagjerë thonë se përjetojnë më shumë sëmundje të lëvizjes (motion sickness) kur udhëtojnë me makina elektrike. Një prej tyre është 24-vjeçarja Lola Baird nga Londra, e cila thotë se prej dy vitesh ndihet shumë e përzier gjatë udhëtimeve të gjata me makinën elektrike të të dashurit, deri në atë pikë sa ka kërkuar që ai ta ndryshojë makinën.
Ekspertët shpjegojnë se “sëmundja e lëvizjes” shkaktohet kur truri merr sinjale të ndryshme nga shikimi, veshi i brendshëm dhe shqisat e trupit për lëvizjen.
Sipas studiuesve, te makinat elektrike mund të ndikojnë disa faktorë:
- Mungesa e zhurmës dhe dridhjeve të motorit, të cilat zakonisht i tregojnë trupit se makina po përshpejton ose ngadalëson.
- Përshpejtimi i menjëhershëm, pasi motorët elektrikë japin fuqi menjëherë.
- Frenimi rigjenerues, i cili mund të shkaktojë ngadalësime më të forta dhe të papritura.
- Ndryshimet e shpeshta të shpejtësisë mund të krijojnë ndjesinë e lëkundjes përpara dhe pas, duke shtuar të përzierat.
Megjithatë, ekspertët theksojnë se kërkimet shkencore mbi lidhjen mes makinave elektrike dhe tw ndjerit keq gjatw lëvizjes janë ende në fazat e hershme. Jo të gjithë pasagjerët preken; disa pronarë të makinave elektrike madje raportojnë se ndihen më pak të sëmurë në to.
Pra, ndërsa ka dëshmi dhe përvoja individuale që sugjerojnë një lidhje, shkencëtarët thonë se ende nuk ka prova të mjaftueshme për të nxjerrë një përfundim përfundimtar.
