Drejtoria e Përgjithshme e Shërbimeve të Transportit Rrugor u ka bërë thirrje drejtuesve të mjeteve që të respektojnë rregullat për errësimin e xhamave, duke kujtuar kufijtë e lejuar dhe rastet kur kërkohet certifikatë miratimi.
Sipas DPSHTRR, një xham konsiderohet i errësuar kur tejçueshmëria e dritës bie nën 70%. Në llogaritjen e nivelit të errësimit merret parasysh si xhami origjinal, ashtu edhe materiali errësues i vendosur mbi të.
Rregullat ndalojnë errësimin e xhamit të përparmë ballor të automjetit. Përjashtim bën vetëm një shirit në pjesën e sipërme të xhamit, me gjerësi deri në 125 milimetra.
Për dy xhamat anësorë të përparmë, atë të drejtuesit dhe të pasagjerit, tejçueshmëria e dritës duhet të jetë jo më pak se 50%. Pra, errësimi total i xhamit origjinal dhe materialit të vendosur mbi të nuk mund të kalojë 50%.
Miratimi i errësimit të dy xhamave të përparmë anësorë kushton 20 mijë lekë, ndërsa certifikata e miratimit kushton edhe 2 mijë lekë.
Për xhamat anësorë të pasmë dhe xhamin fundor lejohen nivele më të larta errësimi, me tejçueshmëri drite nga 10% deri në 70%, me kusht që të mos cenohet sistemi i shikimit prapa.
Për miratimin e errësimit të xhamit fundor, xhamave anësorë dhe atyre trekëndorë të pasëm tarifa është 3 mijë lekë, krahas tarifës prej 2 mijë lekësh për certifikatën.
DPSHTRR sqaron se xhamat origjinalë të errët të homologuar nga prodhuesi, përveç rasteve të caktuara për xhamat e përparmë anësorë, mund të qarkullojnë pa certifikatë miratimi. Certifikatë nuk kërkohet gjithashtu kur materiali i vendosur mbi xham nuk e çon errësimin mbi 30%, pra kur tejçueshmëria e dritës mbetet të paktën 70%.
Ndalohet ndërkohë përdorimi i materialeve me ngjyra të forta si e kuqe, blu, jeshile, e verdhë apo portokalli, materialeve reflektuese ose me efekt pasqyre, atyre që bllokojnë plotësisht shikueshmërinë apo krijojnë turbullim. Nuk lejohet as errësimi përmes lëndëve spërkatëse.
DPSHTRR paralajmëron drejtuesit që, përpara se të errësojnë xhamat, të verifikojnë nivelin e lejuar dhe kriteret ligjore, pasi certifikata e miratimit është e vlefshme vetëm për aq kohë sa zgjat garancia e materialit të përdorur.
