Qeveria shqiptare pritet të shpallë brenda pak ditësh çmimet e reja të referencës për pronat, ndërkohë që një ndryshim i rëndësishëm do të prekë taksimin e pasurive të paluajtshme. Kryeministri Edi Rama deklaroi se për herë të parë, taksa për shtëpinë e dytë do të jetë më e lartë se ajo për banesën e parë, duke sjellë një risi në mënyrën e aplikimit të tatimit mbi pronën.
“Punë ditësh ose javësh do të dalin çmimet e reja të referencës. Ato do të kenë edhe një element të ri: taksa për shtëpinë e dytë do jetë më e madhe sesa për shtëpinë e parë. Kështu që bashkitë, sidomos ato të bregdetit, do të kenë një të ardhur të shtuar nga ky proces, pasi shumë njerëz në bregdet kanë shtëpi të dyta,” u shpreh Rama.
Ai shtoi se rritja e çmimeve të referencës do të sjellë gjithashtu një efekt të drejtpërdrejtë në buxhetet vendore, duke rritur të ardhurat nga tatimi mbi pronën për bashkitë që menaxhojnë mirë këtë taksë. “Kush do ta menaxhojë mirë taksën e pasurisë, do të ketë të ardhura shumë më të mëdha, sepse ajo është baza kryesore në të gjithë bashkitë e botës,” theksoi kryeministri.
Nga ana tjetër, Rama ngriti shqetësimin për vendosjen e taksave lokale të konsideruara si eksesive në disa bashki. Ai përmendi raste konkrete të taksave mbi tavolina të bizneseve të vogla, apo mbi investitorët në miniera dhe energji, duke i cilësuar si “të çuditshme” dhe të papërshtatshme. Sipas tij, kjo situatë kërkon një ndërhyrje nga Ministria e Financave për të krijuar një udhërrëfyes të qartë dhe të arsyeshëm për taksimin vendor.
Ministri i Financave, Petrit Malaj, në një deklaratë të mëvonshme sqaroi se përveç çmimeve të reja të referencës, do të prezantohet edhe një proces i ri i rivlerësimit të pronave. “Vlera e pronave është rritur rreth 26%. Kjo rritje do të përkthehet në të ardhura më të mëdha për bashkitë. Taksa e pronës është një nga taksat më të rëndësishme në bashkitë e Europës dhe duhet të zërë të njëjtën peshë edhe në vendin tonë,” tha Malaj.
Ai shtoi se rivlerësimi i pronave do të ofrohet me një normë tatimore të reduktuar, duke i dhënë mundësi qytetarëve të harmonizojnë vlerën reale të pronave me regjistrimet aktuale. “Krahas vlerës së re të pronave të tyre, qytetarët do të mund të bëjnë edhe rivlerësimin e pronave që kanë aktualisht,” përfundoi ministri.
Ky ndryshim pritet të ndikojë ndjeshëm tregun e pasurive të paluajtshme dhe sistemin e financave vendore, veçanërisht në zonat urbane dhe bregdetare ku numri i pronave të dyta është në rritje./skyweb.al
