Wizz Air Abu Dhabi, një degë e përbashkët e gjigantit hungarez të aviacionit Wizz Air dhe fondit sovran të Emirateve ADQ, ka njoftuar pezullimin ose ndërprerjen e përkohshme të disa linjave ajrore në javët në vijim, si pjesë e një riorganizimi më të gjerë të rrjetit të fluturimeve.
Sipas sistemit të prenotimeve të kompanisë, shitjet e biletave janë ndalur për linjën Abu Dhabi–Varna që nga data 14 korrik, pasuar nga Beogradi më 19 korrik, Tirana më 20 korrik, Kutaisi më 29 korrik dhe Sarajeva më 31 gusht.
Në vijim, do të pezullohen përkohësisht edhe linjat drejt Krakovit (29 korrik–19 shtator), Budapestit (deri më 1 shtator), Vjenës (deri më 21 shtator), Katovicës (deri më 26 tetor), si dhe Astanas dhe Samarkandit (deri më 1 nëntor).
Ndërkohë, fluturimet për në Sofje dhe Kluzh janë ndërprerë tashmë.
Edhe pse kompania nuk ka dhënë një arsye të drejtpërdrejtë për këto ndryshime, lëvizja vjen në një moment kur Wizz Air po përballet me vështirësi serioze për shkak të problemeve të njohura me motorët Pratt & Whitney GTF, të cilët kanë detyruar kompaninë të mbajë të paktën 20% të flotës A320neo të saj të pezulluar gjatë vitit fiskal 2025.
Në qershor, CEO i Wizz Air, József Váradi, u shpreh se kompania po reduktonte qëllimisht fluturimet në rajonet e ashtuquajtura “hot and harsh”, zona me temperatura ekstreme dhe cilësi të dobët të ajrit, pasi këto kushte ndikojnë negativisht në performancën dhe jetëgjatësinë e motorëve.
Váradi tha se fluturimet do të riorientohen në rajone më të qëndrueshme për të ulur kostot operative dhe për të zgjatur jetëgjatësinë e motorëve.
Pavarësisht sfidave, Wizz Air mbylli vitin fiskal me një fitim neto prej 213.9 milionë eurosh, megjithëse me një rënie prej 42% krahasuar me vitin paraardhës. Fitimi operativ pësoi një tkurrje prej 62%.
Kompania ka siguruar 353.6 milionë euro në forma kredish dhe kompensimesh, përfshirë ndihmën nga Pratt & Whitney, si dhe ka marrë 14 motorë rezervë për të lehtësuar ndërprerjet. /aviationweek
