Syzet inteligjente po kthehen në një nga tregjet më premtuese të teknologjisë, të ndihmuara nga zhvillimi i inteligjencës artificiale dhe nga fakti se modelet e reja po duken gjithnjë e më shumë si syze normale.
Sipas Meta-s, gjatë vitit 2025 u shitën në mbarë botën më shumë se 7 milionë palë syze inteligjente, ndërsa kompanitë e mëdha të teknologjisë po shtojnë investimet në këtë kategori.
Meta konsiderohet aktualisht një nga prodhuesit kryesorë me Ray-Ban Meta, ndërsa Google po rikthehet në treg pas dështimit të Google Glass. Edhe Samsung dhe Apple po përgatiten të hyjnë me produktet e tyre.
Ndryshe nga tentativa e parë e Google më shumë se një dekadë më parë, syzet e reja kombinojnë kamera, mikrofon, altoparlantë dhe inteligjencë artificiale pa ndryshuar shumë pamjen e syzeve tradicionale.
Ato mund të përdoren për telefonata, fotografi, video, dëgjim muzike, përkthim të teksteve në kohë reale dhe marrjen e informacionit për objektet që përdoruesi sheh përpara.
Në udhëtime, për shembull, syzet mund të japin udhëzime për orientimin në një qytet të panjohur, të përkthejnë menutë e restoranteve apo të tregojnë informacione për monumentet pa qenë nevoja që përdoruesi të shohë vazhdimisht telefonin.
Disa modele shkojnë edhe më tej. Syzet Even Realities G2 projektojnë informacion direkt përpara syrit të përdoruesit, një teknologji që deri pak vite më parë dukej si pajisje e filmave të James Bond.
Tregu po rritet me shpejtësi edhe në Kinë. Xiaomi, Alibaba dhe prodhuesi i makinave elektrike Li Auto kanë prezantuar modelet e tyre, ndërsa qeveria kineze ka futur syzet inteligjente në programin e subvencioneve për konsumatorët, duke ofruar zbritje prej 15%.
Por teknologjia ka sjellë edhe probleme të reja. Në disa universitete kineze janë regjistruar raste ku studentët kanë përdorur syzet për të fotografuar pyetjet e provimeve dhe për të marrë përgjigjet direkt në ekranin përpara syve.
Shqetësimi më i madh lidhet me privatësinë. Kamerat e integruara mund të përdoren për fotografime apo filmime pa dijeninë e personave përreth, duke ngritur pikëpyetje për kufijtë ligjorë të përdorimit të tyre.
Për këtë arsye, administrata e gjykatave të Nju Jorkut ka ndaluar përdorimin e syzeve inteligjente me kamera, mikrofon ose kompjuter të integruar brenda ambienteve gjyqësore.
Syzet me inteligjencë artificiale po shndërrohen kështu nga një eksperiment teknologjik në një pajisje që mund të ndryshojë mënyrën se si njerëzit komunikojnë, udhëtojnë dhe marrin informacion, por zgjerimi i tyre po hap njëkohësisht një debat të madh për privatësinë dhe kufijtë e teknologjisë. /skyweb.al
