Tregu shqiptar i automjeteve po njeh një rritje të fortë të makinave elektrike, të cilat po zënë një peshë gjithnjë e më të madhe veçanërisht te mjetet e reja.
Sipas të dhënave të Drejtorisë së Përgjithshme të Shërbimeve të Transportit Rrugor, gjatë periudhës janar–korrik 2026 janë regjistruar për herë të parë 6,396 automjete plotësisht elektrike.
Krahasuar me të njëjtën periudhë të vitit 2025, numri i regjistrimeve të makinave “All-Electric” është rritur me 126%, pra është më shumë se dyfishuar brenda një viti.
Rritja bëhet edhe më e dukshme te automjetet e reja. Sipas DPSHTRR-së, makinat elektrike përbëjnë tashmë 40.5% të të gjitha mjeteve me 0 kilometra të regjistruara në Shqipëri gjatë shtatë muajve të parë të vitit.
Edhe kjo peshë është rritur ndjeshëm krahasuar me një vit më parë. DPSHTRR raporton një rritje prej 68% për automjetet elektrike të reja në raport me periudhën janar–korrik 2025.
Të dhënat tregojnë se elektrifikimi i flotës po ecën me ritme shumë më të shpejta se më parë, ndërsa automjetet elektrike nuk përbëjnë më vetëm një segment të vogël të tregut, por po afrohen drejt gjysmës së regjistrimeve të makinave të reja.
Rritja lidhet edhe me zgjerimin e ofertës së modeleve elektrike në tregun shqiptar, veçanërisht nga prodhuesit aziatikë, ndërsa kostot e përdorimit dhe mungesa e akcizës për karburantet i bëjnë këto automjete gjithnjë e më tërheqëse për një pjesë të blerësve.
