Mbi 1,000 blerje të kryera në Itali, me vlerë të përgjithshme rreth 2 milionë euro, janë vendosur nën hetim nga autoritetet doganore shqiptare dhe italiane.
Transaksionet lidhen me dy raste të veçanta, përkatësisht me vlerë rreth 988,684 euro dhe 1,033,338 euro.
Hetimi përfshin periudhën nga janari 2022 deri në korrik 2025 dhe është përqendruar te kërkesat për rimbursimin e TVSH-së përmes skemës “tax free”.
Sipas skemës së dyshuar, mallrat bliheshin në Itali dhe deklaroheshin si produkte për përdorim personal, duke mundësuar marrjen e rimbursimit të TVSH-së.
Por një pjesë e tyre dyshohet se është futur më pas kontrabandë në Shqipëri për qëllime tregtare, pa u deklaruar në doganë dhe pa u paguar detyrimet e importit.
Nga analiza e të dhënave është konstatuar një numër i pazakontë transaksionesh, mesatarisht rreth 13 fatura në muaj për secilin rast.
Në ditë të veçanta janë regjistruar grupe me nga 9 deri në 11 fatura, një volum që, sipas Doganave, ngre dyshime se blerjet nuk janë kryer për përdorim personal.
Verifikimet kanë evidentuar gjithashtu mungesë të burimeve të ligjshme të të ardhurave që të justifikojnë blerjet dhe mospërputhje në destinacionin e mallrave.
Hetimi po zhvillohet nga Drejtoria e Përgjithshme e Doganave në bashkëpunim me administratën doganore italiane dhe institucionet ligjzbatuese shqiptare.
Autoritetet italiane kishin përcjellë për verifikim kërkesat e dyshimta për rimbursim të TVSH-së dhe transaksionet e kryera përmes sistemit “tax free”.
Materialet paraprake dhe gjetjet e hetimit i janë referuar Prokurorisë së Tiranës, e cila pritet të verifikojë përgjegjësitë për kontrabandë dhe shmangie të detyrimeve doganore.
