Shqipëria është përfshirë nga media amerikane “Quartz” në listën e 10 destinacioneve që ia vlen të vizitohen gjatë vitit 2026, me vëmendje të veçantë ndaj Rivierës Shqiptare.
Në artikull, Shqipëria vlerësohet për bukuritë natyrore, pasurinë kulturore dhe kostot relativisht të ulëta të një udhëtimi, ndërsa theksohet se vendi ende nuk është përfshirë në të njëjtën shkallë të turizmit masiv si shumë prej destinacioneve të tjera të Mesdheut.
Sipas “Quartz”, destinacionet e përzgjedhura në këtë listë ofrojnë një mundësi për t’i vizituar përpara se rritja e numrit të turistëve, çmimeve dhe flukseve të vizitorëve të sjellë më shumë turma dhe pritje të gjata.
Riviera Shqiptare, alternativë më e përballueshme në Mesdhe
Në fokus të artikullit është bregdeti shqiptar, i cili shtrihet nga Vlora në jug deri në Sarandë.
Riviera Shqiptare përshkruhet si një zonë me ujëra të kristalta, plazhe dhe male që takohen me brigjet e Adriatikut dhe Jonit. Për “Quartz”, një tjetër avantazh i rëndësishëm janë çmimet, të cilat mbeten më të ulëta krahasuar me destinacione të njohura turistike në Itali, Kroaci apo Greqi.
Dhërmiu, Himara dhe Ksamili janë ndër zonat bregdetare të përmendura në artikull. Pozicioni i tyre përballë ishullit të Korfuzit ka bërë që edhe turistë nga Greqia të udhëtojnë drejt Shqipërisë për vizita ditore, duke kërkuar ushqime me çmime më të favorshme dhe plazhe më pak të frekuentuara.
Një bregdet ende larg turizmit masiv
Artikulli e lidh zhvillimin relativisht të vonshëm turistik të Shqipërisë me historinë e saj.
Për dekada, vendi qëndroi i izoluar nën regjimin komunist, i cili kufizonte ndjeshëm kontaktet me botën e jashtme. Izolimi përfundoi në fillim të viteve 1990, por zhvillimi masiv i resorteve turistike, që kishte përfshirë pjesë të tjera të Mesdheut, nuk arriti në të njëjtën masë në Shqipëri.
Edhe sot, sipas artikullit, përgjatë bregdetit shqiptar ka më pak ndërtime shumëkatëshe dhe shërbimet në plazhe, përfshirë shezlongët dhe çadrat, mbeten më të përballueshme se në disa prej destinacioneve më të njohura mesdhetare.
Gjirokastra dhe Berati, pasuria historike e Shqipërisë
Përtej plazheve, “Quartz” veçon edhe pasurinë kulturore të vendit.
Gjirokastra, e njohur si “qyteti i gurtë”, tërheq vëmendjen për shtëpitë karakteristike të periudhës osmane, çatitë prej pllakash guri, Pazarin dhe Kalanë që dominon qytetin.
Një tjetër ndalesë e rëndësishme është Berati, i njohur si “qyteti i një mbi një dritareve”. Shtëpitë e bardha të periudhës osmane, të vendosura në shpatet përgjatë lumit, krijojnë një prej peizazheve më karakteristike urbane të Shqipërisë.
Të dy qytetet janë pjesë e Listës së Trashëgimisë Botërore të UNESCO-s.
Edhe Tirana po ndryshon
Në listë nuk mungon kryeqyteti.
Sipas artikullit, Tirana po përjeton një transformim të dukshëm urban. Ndërtesa që dikur kishin një pamje të zymtë janë rikonstruktuar dhe lyer me ngjyra të ndryshme, ndërsa qyteti po përpiqet të krijojë një identitet më modern dhe të orientuar drejt dizajnit.
Kjo prirje synon që Tirana të mos shihet vetëm si një pikë tranziti për turistët, por si një destinacion më vete.
Më e aksesueshme dhe ende më e lirë
Rritja e fluturimeve direkte nga disa prej qendrave kryesore evropiane ka ndihmuar gjithashtu në përmirësimin e aksesit drejt Shqipërisë.
Një prej argumenteve kryesore të artikullit mbetet kostoja e udhëtimit. Sipas “Quartz”, një vakt, një dhomë hoteli apo një makinë me qira në Shqipëri mund të kushtojnë dukshëm më pak sesa shërbime të ngjashme në bregdetin dalmat të Kroacisë gjatë sezonit veror.
Ndërkohë, Shqipëria vijon procesin e negociatave për anëtarësimin në Bashkimin Evropian dhe po investon në infrastrukturë.
Pikërisht këto zhvillime bëjnë që diferenca aktuale e çmimeve me destinacionet e tjera mesdhetare të mos konsiderohet e përhershme.
Për “Quartz”, Shqipëria është një prej destinacioneve që mund të ofrojë një kombinim të detit, natyrës, historisë dhe kostove më të ulëta, përpara se rritja e mëtejshme e turizmit ta ndryshojë këtë panoramë.
