Një zjarr i rënë pranë zonës së Manastirit në Sarandë ka detyruar Operatorin e Sistemit të Shpërndarjes (OSSH) të ndërpresë përkohësisht furnizimin me energji elektrike në zonën përreth dhe në një pjesë të Ksamilit.
Sipas njoftimit të OSSH-së, ndërprerja e energjisë zgjati rreth 10 minuta dhe u krye me kërkesë të forcave zjarrfikëse që po punonin për shuarjen e flakëve.
Stakimi i energjisë u bë si masë sigurie, me qëllim mbrojtjen e rrjetit elektrik nga dëmtime të mundshme dhe krijimin e kushteve të sigurta për ndërhyrjen e zjarrfikësve në terren.
OSSH bën të ditur se situata është normalizuar dhe furnizimi me energji elektrike është rikthyer.
