Administrata Tatimore ka sqaruar sot publikisht se individët e regjistruar si tregtarë ambulantë nuk kanë detyrimin për të lëshuar faturë tatimore dhe as për të mbajtur dokumentacion tatimor për mallrat apo shërbimet që tregtojnë.
Ky përjashtim është i parashikuar në ligjin nr. 87/2019 “Për faturën dhe sistemin e monitorimit të qarkullimit”, i ndryshuar, konkretisht në nenin 5, pika 1, gërma c). Gjithashtu, edhe ligji nr. 9920, datë 19.05.2008, “Për procedurat tatimore në Republikën e Shqipërisë”, i ndryshuar, në nenin 5, pika 1, gërma j), e përcakton qartë statusin dhe kushtet e ushtrimit të aktivitetit të tregtarëve ambulantë.
Detyrimet që u takojnë këtyre individëve janë:
- Të jenë mbi 16 vjeç;
- Të jenë vetëpunësuar, pa të punësuar të tjerë;
- Të tregtojnë në hapësira publike vetëm me leje të lëshuar nga bashkia përkatëse;
- Të jenë të regjistruar si tregtarë ambulantë pranë Drejtorisë Rajonale Tatimore;
- Të paguajnë kontributet e detyrueshme të sigurimeve shoqërore dhe shëndetësore;
- Të paguajnë tarifën për zënien e hapësirës publike dhe taksat bashkiake përkatëse.
Administrata Tatimore nënvizon se ky regjim i thjeshtuar u vjen në ndihmë individëve me aktivitet të vogël, duke shmangur barrën e faturimit elektronik dhe dokumentacionit të zgjatur, ndërsa garanton përfshirjen e tyre në sistemin fiskal përmes regjistrimit dhe pagesës së detyrimeve përkatëse.
