Detaje të reja dalin nga koncesioni për shënjimin dhe monitorimin e karburanteve, një shërbim që rikthehet në Shqipëri.
Ofruesi i vetëm i shërbimit do të jetë kompania ALBTrace, e krijuar si një shoqëri me kapital të përbashkët publik dhe privat.
Sipas dokumenteve të shoqërisë, 51% e aksioneve zotërohen nga Shtypshkronja e Letrave me Vlerë, kompani në pronësi të shtetit shqiptar. Pjesa tjetër prej 49% kontrollohet nga O&S Security and Solutions LLP, një kompani e regjistruar në Emiratet e Bashkuara Arabe, me seli në zonën industriale KEZAD në Abu Dhabi.
Kompania do të ketë ekskluzivitetin e shërbimit dhe do të arkëtojë pagesat që lidhen me shënjimin e karburanteve.
Tarifa e përcaktuar është 6.5 euro pa TVSH për çdo 1 mijë litra karburant të importuar ose tregtuar.
Për një autobot me 30 mijë litra, kostoja shtesë arrin në 195 euro pa TVSH.
Kjo kosto shtesë e importuesve dhe tregtuesve pritet të përfshihet në çmimin përfundimtar të shitjes dhe t’u transferohet konsumatorëve.
Skema e re rikthen një shërbim të detyrueshëm në tregun e karburanteve, i cili edhe në të kaluarën është zbatuar përmes shënjimit të naftës dhe benzinës.
Pagesa e re i shtohet akcizës, taksës së qarkullimit, taksës së karbonit dhe TVSH-së që përfshihen aktualisht në çmim.
Çdo rritje e kostos së karburantit prek drejtpërdrejt transportin, bujqësinë, ndërtimin, industrinë dhe bizneset e shërbimeve./skyweb.al
