Inceneratori i Tiranës raportoi për vitin 2025 një fitim neto prej 6.7 milionë eurosh dhe 7.9 milionë euro para tatimit. Kjo ndodh ndërsa impianti i incenerimit, investimi kryesor për të cilin u dha koncesioni, nuk është ndërtuar ende, thuajse nëntë vjet pas nënshkrimit të kontratës.
Integrated Energy BV, e sekuestruar nga SPAK dhe e administruar prej tre vjetësh nga shteti, vazhdon të arkëtojë pagesa publike nga bashkitë për depozitimin e mbetjeve.
Sipas bilancit të dorëzuar në QKB, kompania siguroi rreth 16 milionë euro të ardhura dhe një marzh fitimi neto rekord prej 44.8%.
Kapitali i akumuluar ka arritur mbi 44 milionë euro, ndërsa kompania deklaron se gjatë viteve të fundit nuk ka shpërndarë dividendë.
SPAK ka konstatuar se nga nënshkrimi i kontratës deri në vitin 2023, koncesionari arkëtoi 11.3 miliardë lekë, ndërsa për ndërtimin e objektit u investuan vetëm 21 milionë euro.
Ndërkohë që inceneratori merr para, Tirana vazhdon të përballet me kazanë të tejmbushur, mbetje në trotuare dhe erë të rëndë, pavarësisht rritjes së vazhdueshme të fondeve për pastrimin.
Në një raportim gjatë ditës së djeshme, ACQJ shkruante se buxheti për mbetjet dhe pastrimin u rrit nga 2.7 miliardë lekë në vitin 2023 në 4.26 miliardë lekë në vitin 2026.
Eco Tirana po blen edhe 3 mijë kazanë të rinj për 153 milionë lekë, por miliardat dhe tenderët nuk po përkthehen në rrugë më të pastra.
Vetëm gjatë vitit 2025, kryeqyteti prodhoi 288 mijë tonë mbetje, afro 30% të totalit kombëtar.
Impianti kryesor nuk ekziston, pagesat publike vazhdojnë, kompania prodhon miliona euro fitim dhe Tirana mbetet e mbuluar nga plehrat.
A ka histori më të paprecedentë korrupsioni se kjo, ku shteti paguan për një investim të parealizuar, ndërsa qytetarët paguajnë sërish taksën e pastrimit për një shërbim që nuk e marrin? /skyweb.al
