Agjencitë turistike italiane po sinjalizojnë një rënie të ndjeshme të interesit për Shqipërinë si destinacion pushimesh, sidomos për turistët italianë që dikur e konsideronin vendin përtej Adriatikut si alternativë ekonomike dhe ekzotike. “Që nga fundi i sezonit të kaluar vumë re një rënie në interes, por këtë vit, në 2025, është bërë shumë më e theksuar,” deklaron Michele Viola, drejtues i agjencisë turistike Goodays në Bari. Sipas tij, rezervimet për bregdetin shqiptar janë sot më pak se gjysma e atyre të regjistruara tre vite më parë.
Në vend të Shqipërisë, grupet e organizuara po orientojnë pushimet drejt destinacioneve si Egjipti, Dubai apo Spanja, ndërsa ata që zgjedhin të qëndrojnë brenda Italisë, i janë kthyer zonave bregdetare të Puglias dhe strukturave të tipit Bed & Breakfast. Kjo strategji, sipas Viola-s, ka rritur qarkullimin e agjencisë.
Tendenca negative për Shqipërinë vjen pas një kulmi të përkohshëm rritjeje, kur fluksi i turistëve italianë ishte shtuar me 30%, i nxitur nga bukuritë natyrore dhe çmimet konkurruese. Por duket se ky avantazh ka humbur.
“Familjet italiane po përballen me një tkurrje të ndjeshme të të ardhurave. Më parë Shqipëria ofronte një balancë të mirë mes çmimit dhe shërbimit, por kjo nuk është më e vlefshme,” shprehet Viola.
Massimo Salomone, koordinator për turizmin në Confindustria Puglia, thekson se Shqipëria ka përfituar nga investimet infrastrukturore dhe fleksibiliteti burokratik, por nënvizon problematikat që lidhen me cilësinë e shërbimeve dhe mungesën e transparencës në çmime. “Lidhja që i bëhet Shqipërisë si një destinacion turistik ‘i lirë’ shpesh është e gabuar,” thotë ai, duke sugjeruar ndërtimin e sinergjive të përbashkëta me rajone si Puglia, përmes projekteve ndërkufitare në turizëm dhe infrastrukturë.
Piero Innocenti, zëvendëspresident i Fiavet Puglia, e sheh rënien e kërkesës për Shqipërinë si pasojë të zhbalancimit mes çmimit dhe cilësisë së ofruar: “Klientela që dikur pranonte shërbime të thjeshta për një çmim të volitshëm, sot nuk e ndien më këtë leverdi.” Ai shton se rritje të ngjashme çmimesh po regjistrohen edhe në Kroaci dhe Mal të Zi, ndërsa Greqia ende mban qëndrueshmëri.
Ndërkohë, segmenti i udhëtimeve me kroçerë po performon mirë edhe gjatë muajve të vjeshtës, dhe Puglia po ruan të njëjtin nivel turistik si viti i kaluar, me ndihmën e zgjerimit të lidhjeve ajrore ndërkombëtare.
Në këtë sfond, “efekti Shqipëri” duket se po zbehet, jo për mungesë bukurish natyrore, por për mungesë raporti të drejtë mes çmimit dhe vlerës së ofruar. /Corrieri
