Bumi turistik i Shqipërisë në vitin 2024 ishte aq i lartë sa vendi më në fund ka hyrë në një renditje pozitive, ku është i pari nga fillimi dhe jo i pari nga fundi.
Eurostat publikoi të dhënat e netëve të shpenzuara nga turistët në njësitë akomoduese, ku rezulton se Shqipëria kishte rritjen më të lartë në Europë të netëve të shpenzuara nga turistët në 2024-n, në raport me 2023-n, me 24%, përkundrejt 2.7% që ishte mesatarja e Europës.
Në vendet e tjera të rajonit, rritja ka qenë e vakët, si psh në Serbi vetëm 1.8%, në Maqedoninë e Veriut 5.2%, në Mal të Zi, që është një konkurrent direkt i yni, vetëm 1.5% dhe në Kosovë me 3.5%.
Shqipëria është e dyta në krahasimin midis 2024-s dhe 2019-s, me 128%, ndërsa e para është Kosova, që pa një rritje tepër të fortë me 239%.
Sipas Eurostat, Gjatë vitit 2024, netët që turistët kaluan në akomodimet turistike në Bashkimin Europian u rritën me 2,7 % krahasuar me 2023-ën dhe tejkaluan 3 miliardë netë për herë të parë.
Afër 63 % e netëve u kryen në hotele dhe akomodime të ngjashme, 23,7 % në apartamente me qira ose akomodime të shkurtra, dhe 13,5 % në kampingje, parkime për karavana etj.
Nga vendet e BE-së, Qipro dhe Malta shënuan rritjen më të madhe me 14,5 % dhe 14,4 % përkatësisht. Letonia vijoi me rritje prej 7,4 % krahasuar me vitin e mëparshëm.
Në anën tjetër, vetëm Finlanda (–0,7 %) dhe Franca (–0,6 %) patën një ulje të vogël të netëve turistike, ndërsa vendet si Belgjika dhe Suedi regjistruan rritje modeste prej 0,3 %.
Pothuajse gjysma e netëve (51,9 %) ishin nga turistë vendas në vendin e tyre, ndërsa 48,1 % nga turistë ndërkombëtarë. Nga këta të fundit, 61,6 % erdhën nga vende të tjera të BE-së, 21,3 % nga vendet evropiane jashtë BE-së, dhe 16,4 % nga pjesë të tjera të botës si Amerika Veriore, Azia, Afrika etj. /Monitor
