Operatorët e transportit publik në Tiranë kanë kërcënuar sërish me reduktimin e shërbimit, duke kërkuar që qeveria t’u japë para nga taksat e shqiptarëve për të mbuluar një pjesë të kostos së karburantit.
Shoqatat e transportit paralajmërojnë se nga 1 shtatori do të nxjerrin në qarkullim 20–30% më pak autobusë, nëse nuk zgjatet me të paktën tre muaj skema e kompensimit prej 50 lekësh për çdo litër naftë.
Në një letër drejtuar Kryeministrisë, ministrive përgjegjëse dhe Bashkisë së Tiranës, operatorët deklarojnë se nuk kanë më mundësi financiare të punojnë me flotë të plotë.
Por faturën e përplasjes së tyre me qeverinë pritet ta paguajnë qytetarët. Reduktimi i autobusëve do të sjellë pritje më të gjata në stacione, mjete të tejmbushura dhe vështirësi të shtuara për mijëra persona që përdorin çdo ditë transportin publik.
Shoqatat pretendojnë se kostot e karburantit dhe shpenzimet e tjera kanë cenuar likuiditetin e kompanive, duke e bërë të papërballueshëm operimin me 100% të mjeteve.
Kërkesa për para publike është përsëritur vazhdimisht që prej muajit maj, ndërsa vetëm gjatë gushtit operatorët kanë dërguar dy paralajmërime për reduktimin e flotës.
Në thelb, mesazhi drejtuar qeverisë është i qartë: ose kostot e kompanive private mbulohen me taksat e shqiptarëve, ose qytetarët do të lihen në stacione dhe do të përballen me një shërbim edhe më të dobët.
