Në Shqipëri, përmbytjet nuk përbëjnë më ngjarje të rralla, por një kërcënim të përsëritur që prek si qytetet ashtu edhe zonat rurale, duke shkaktuar dëme të mëdha materiale dhe pasiguri për banorët. Një studim i publikuar në revistën shkencore Geographica Pannonica evidencon se shumica e shqiptarëve nuk kanë kapacitete financiare për të përballuar humbjet që vijnë nga fatkeqësitë natyrore.
Sipas të dhënave, 61% e banorëve në zonat rurale dhe 80% në zonat urbane deklarojnë se nuk kanë mundësi financiare për të përballuar pasojat e përmbytjeve.
Në nivel global, Shqipëri renditet ndër vendet më të prekura ekonomikisht nga fatkeqësitë natyrore. Sipas Banka Botërore, humbjet mesatare vjetore arrijnë në rreth 2.5% të Prodhimit të Brendshëm Bruto. Gjatë periudhës 1995–2015, mesatarisht 30 mijë persona në vit dhe mbi 95% e bashkive janë prekur nga fatkeqësi të ndryshme natyrore.
Megjithatë, vendi ende nuk disponon një sistem të plotë monitorimi dhe parashikimi të rreziqeve, ndërsa sigurimi ndaj fatkeqësive mbetet i kufizuar dhe mbështetja financiare për qytetarët është e pamjaftueshme.
Studimi i fundit përfshiu katër zona të prekura nga përmbytjet: dy urbane, Tiranën dhe Fierin, si dhe dy rurale, Dajçin dhe Novoselën. Rezultatet nxorën në pah dallime të dukshme. Banorët e qyteteve rezultojnë më pak tolerantë ndaj rrezikut, por njëkohësisht më pak të përgatitur për ta përballuar atë. Në të kundërt, komunitetet rurale shfaqin një “qëndrueshmëri të heshtur”, të ndërtuar mbi përvojën dhe vetëorganizimin. Ata marrin masa praktike, si krijimi i rezervave ushqimore, ndërsa në qytet rreziku perceptohet si më i largët.
Në të gjitha zonat, pritshmëritë ndaj shtetit mbeten të larta. Shumica e të anketuarve presin mbështetje financiare pas përmbytjeve dhe një pjesë shprehen në favor të masave parandaluese, veçanërisht kufizimit të ndërtimeve në zona me rrezik të lartë.
Studimi thekson gjithashtu rolin e kulturës kombëtare në perceptimin e rrezikut. Bindja se ngjarjet janë “në dorë të Zotit” ndikon në mënyrën se si qytetarët i qasen fenomeneve natyrore, përfshirë përmbytjet, duke ndikuar si në nivelin e përgatitjes, ashtu edhe në reagimin ndaj tyre.
