Fermerët e përzgjedhur në fazën e parë të Skemës Kombëtare të Mbështetjes në Bujqësi 2026 do të kenë më shumë kohë për të plotësuar dokumentacionin e nevojshëm për përfitimin e financimit.
Agjencia për Zhvillim Bujqësor dhe Rural ka njoftuar se afati për dorëzimin e dokumenteve shtesë për masat mbështetëse nr. 1–7 dhe nr. 9 është shtyrë deri më 11 shtator 2026.
Sipas AZHBR-së, shtyrja synon t’u japë aplikantëve kohën e nevojshme për plotësimin e dokumentacionit dhe të lehtësojë procesin e administrimit dhe verifikimit të kërkesave.
Afati i mëparshëm për përfituesit e masave 1–4 ishte 10 gushti, ndërsa fermerët e përzgjedhur në masat 5–7 dhe masën 9 duhej t’i plotësonin kushtet deri më 13 gusht.
Fermerët që nuk dorëzojnë dokumentacionin brenda afatit të ri do të skualifikohen dhe do të humbasin mundësinë për të përfituar mbështetje financiare.
Skema Kombëtare 2026 ka regjistruar 42.728 aplikime nga i gjithë vendi. Vlera e financimit të kërkuar arrin në 7,2 miliardë lekë, rreth 2 miliardë lekë më shumë se fondi prej 5,2 miliardë lekësh i vendosur në dispozicion.
Fieri kryeson për numrin e aplikimeve, i ndjekur nga Korça, Elbasani dhe Vlora, qarqe me peshë të konsiderueshme në prodhimin bujqësor dhe blegtoral.
Skema e këtij viti përmban 12 masa mbështetëse, nga të cilat nëntë janë masa direkte dhe tri lidhen me investimet.
Masat direkte përfshijnë mbështetjen për tufën bazë të gjedhit dhe të imtave, bletarinë, dosat dhe paradosat, kontrollin biologjik, fermat organike, certifikimin Global G.A.P., sipërfaqet e mbjella dhe ripopullimin e ujërave të brendshme.
Interesi më i lartë është regjistruar për tufën bazë të të imtave, me 7.236 aplikime, bletarinë me 7.016 aplikime dhe tufën bazë të gjedhit me 6.732 aplikime.
Tri masat e investimeve mbështesin fermerët e rinj deri në 40 vjeç, ndërtimin ose rikonstruksionin e staneve dhe mekanizimin e bujqësisë. Synimi është ulja e kostove, rritja e cilësisë së produkteve dhe përmirësimi i standardeve të prodhimit bujqësor. /skyweb.al
