Eksperti i njohur britanik i udhëtimeve, Simon Calder, ka zbuluar zgjedhjen e tij për një prej destinacioneve më të mira dhe më ekonomike për pushimet e vjeshtës, duke veçuar Shqipërinë si një vend që ofron një raport të jashtëzakonshëm mes çmimit dhe përvojës turistike.
Në një artikull e përditshmja britanike Daily Express shkruan se Shqipëria po shndërrohet me shpejtësi në një destinacion të preferuar për turistët, ndërsa çmimet, sipas Calder, mbeten ende në nivele relativisht të ulëta.
Eksperti britanik ka një lidhje të hershme me vendin. Siç tregoi në emisionin britanik “This Morning” të ITV-së në vitin 2024, ai e kishte zbuluar Shqipërinë shumë kohë përpara se vendi të merrte vëmendjen ndërkombëtare si destinacion turistik.
Në atë kohë, Calder foli drejtpërdrejt nga hoteli i tij në Durrës, ku kishte mbërritur një mbrëmje më parë. Duke iu drejtuar moderatorëve Ben Shephard dhe Cat Deeley, ai e përshkroi qytetin me entuziazëm.
“Dielli ka dalë, është absolutisht fantastike dhe është një nga qytetet më historike dhe më të bukura në Shqipëri”, tha ai.
Por, përtej peizazheve dhe historisë, ajo që e ka impresionuar më shumë Calder është kostoja e ulët e jetesës dhe e udhëtimit në Shqipëri.
Sipas tij, një picë dhe një birrë kushtojnë rreth 6 paund, ndërsa udhëtimi me autobus nga aeroporti drejt hotelit, një distancë prej rreth 30 km, do t’i kishte kushtuar vetëm disa paund, nëse nuk do ta kishte humbur autobusin e fundit.
Calder vlerësoi gjithashtu mikpritjen e shqiptarëve, duke i cilësuar ata ndër njerëzit më të ngrohtë dhe më mikpritës që mund të takosh.
Eksperti tregoi se, pasi kuptoi se kishte humbur autobusin, vendasit u angazhuan menjëherë për ta ndihmuar. Ata e ndihmuan të gjente një taksi dhe u kujdesën që ai të dinte saktësisht se sa duhej të paguante, në mënyrë që të mos tarifohej më shumë seç duhej.
Sipas Calder, Shqipëria ende nuk është përfshirë gjerësisht në tregun e paketave turistike, por ai parashikon që operatorët turistikë do ta zbulojnë potencialin e vendit në vitet e ardhshme.
Me fluturime të përditshme drejt Shqipërisë nga aeroportet kryesore të Britanisë së Madhe dhe një udhëtim prej vetëm rreth tre orësh, vendi po paraqitet gjithnjë e më shumë si një alternativë tërheqëse për turistët britanikë.
Për turistët që, ashtu si Calder, zgjedhin Durrësin si bazë për pushimet e tyre, qyteti ofron një gamë të gjerë atraksionesh.
Durrësi njihet veçanërisht për amfiteatrin romak, një prej monumenteve më të rëndësishme historike të qytetit, i cili ruan edhe mozaikë të vlefshëm që vizitorët mund t’i shohin nga afër.
Sipas vlerësimeve në TripAdvisor, atraksioni është shumë i pëlqyer nga turistët. Një prej vizitorëve e ka cilësuar atë si një vend që “duhet parë patjetër”.
Një tjetër turist, duke komentuar përvojën e tij, shkruan se vendi është “absolutisht i mrekullueshëm” dhe shprehet i habitur që disa vizitorë mjaftohen vetëm me fotografitë nga jashtë, duke mos paguar rreth 200 lekë për të hyrë brenda.
Për ata që preferojnë një pushim tradicional buzë detit, Durrësi ofron gjithashtu plazhe të gjata me rërë të bardhë dhe ujëra të kristalta në ngjyrë bruz.
Në një kohë kur turistët britanikë po kërkojnë gjithnjë e më shumë destinacione të përballueshme për pushimet e vjeshtës, Shqipëria duket se po fiton një tjetër mbështetës të rëndësishëm: eksperti britanik i udhëtimeve, Simon Calder.
