Hirra e qumështit, që dikur përdorej kryesisht për ushqimin e derrave, është kthyer në një nga produktet më të kërkuara nga industria ushqimore.
Shkak është bërë mania për konsumimin e proteinave, e nxitur veçanërisht nga rrjetet sociale dhe produktet e promovuara për personat që ushtrohen në palestër.
Sipas kompanisë kërkimore Vesper, çmimi i proteinës së hirrës u pesëfishua në tre vjet, ndërsa prodhuesit e djathit nuk arritën ta shtonin prodhimin me të njëjtin ritëm.
Një mungesë e ngjashme është shfaqur edhe për gjizën, e rekomanduar masivisht nga ndikuesit në TikTok si ushqim për shtimin e masës muskulore. Çmimi i saj është rritur po ashtu ndjeshëm.
Rrjetet sociale po krijojnë kërkesë globale për produkte të caktuara brenda pak javësh, ndërsa fermerëve dhe fabrikave u duhen muaj apo vite për të rritur prodhimin.
Kjo ndodhi me çokollatën e Dubait, e cila u bë virale në TikTok dhe rriti ndjeshëm kërkesën botërore për fistikë.
Edhe matcha, një çaj jeshil japonez i kthyer në trend në Instagram dhe TikTok, pësoi rritje të fortë të çmimeve për shkak të mungesës së lëndës së parë.
Problemi është se bimët e përdorura për prodhimin e tij kërkojnë vite për t’u rritur, ndaj oferta nuk mund t’i përgjigjet menjëherë kërkesës.
Kompanitë ushqimore po përpiqen t’i parashikojnë më herët tendencat dhe të sigurojnë furnizimet përpara konkurrentëve.
Starbucks, për shembull, po analizon në kohë reale sjelljen e miliona klientëve në internet për të kuptuar se cilat produkte mund të bëhen virale.
Megjithatë, jo çdo modë rezulton e suksesshme. Kafetë me vaj ulliri të Starbucks u hoqën nga tregu amerikan dhe kanadez pas ankesave të konsumatorëve për efekte laksative.
Sfida e re për industrinë është të dallojë në kohë nëse një produkt viral do të kthehet në zakon afatgjatë apo do të harrohet sapo rrjetet sociale të zbulojnë trendin e radhës. /Economist
