Ish-zëvendëskryeministri Arben Ahmetaj ka lëshuar akuza të forta ndaj kryebashkiakut të Tiranës, Erion Veliaj, gjatë intervistës në emisionin “Çim Peka Live”.
Ahmetaj deklaroi se Veliaj kishte festuar me drejtorët e tij ditën kur ndaj ish-zëvendëskryeministrit ishte lëshuar urdhërarresti.
“Erion Veliaj, ditën që ka dalë urdhri i arrestit për mua, ka hapur shishe uiski me drejtorët e vet, të cilët i bëri të gjithë koka turku”, deklaroi Ahmetaj.
Sipas tij, Veliaj kishte shprehur bindjen se pas goditjes ndaj Ahmetajt nuk do të kishte më arrestime të tjera.
“Tha: ‘Tani kryeministri s’ka më arrestime, se e mbylli ky. E mbylla unë’”, vijoi ish-zëvendëskryeministri.
Ahmetaj shkoi edhe më tej, duke pretenduar se kryebashkiaku do të festonte sërish nëse ai do të humbiste jetën në burg.
“Erioni do të hapte shishe tjetër kur unë të humbja jetën në burg. Do të isha i eliminuar”, deklaroi Ahmetaj.
Gjatë intervistës, ai akuzoi gjithashtu Veliajn se qëndron pas çështjes “5D”, ndërsa drejtorët e Bashkisë së Tiranës të përfshirë në hetime i cilësoi “koka turku”. Pretendimet e Ahmetajt nuk janë shoqëruar me prova publike dhe deri tani nuk ka një reagim nga Erion Veliaj.
