Një studim i ri i publikuar nga Radiological Society of North America (RSNA) ka zbuluar se dhjami i grumbulluar në zonën e barkut – i njohur zakonisht si “bark birre” – përfaqëson një rrezik shumë më të madh për zemrën sesa mbipesha e zakonshme. Studiuesit analizuan imazhe të zemrës me rezonancë magnetike (MRI) tek më shumë se 2,200 të rritur të moshave 46 deri në 78 vjeç, të gjithë pa sëmundje të njohura kardiovaskulare, dhe zbuluan se forma e trupit është më përcaktuese për rrezikun kardiak sesa pesha në total.
Sipas studimit, obeziteti abdominal, matje e përcaktuar nga raporti bel-vathë (WHR) lidhet me ndryshime shqetësuese në strukturën e zemrës. Tek individët me bark të theksuar, muskulatura e zemrës rezulton më e trashë, ndërsa dhomat e brendshme të saj janë më të vogla, çka kufizon sasinë e gjakut që zemra mund të pompojë. Këto ndryshime strukturore njihen si “rimodelim kardiak” dhe konsiderohen pararendëse të dështimit të zemrës.
Ndikimi është dukshëm më i fortë tek meshkujt. Studiuesit vënë në dukje se burrat kanë prirje biologjike për të depozituar dhjamin në zonën e barkut dhe, ndryshe nga gratë, nuk përfitojnë nga mbrojtja hormonale që ofron estrogjeni. Kjo bën që rreziku kardiovaskular nga barku i birrës të jetë më i lartë dhe dëmtimet e zemrës më të theksuara.
Studimi nënvizon gjithashtu se BMI, matja më e përdorur sot për të vlerësuar mbipeshën, nuk është tregues i mjaftueshëm për të kuptuar rrezikun e vërtetë kardiak. Dy persona me të njëjtin BMI mund të kenë rreziqe shumë të ndryshme, në varësi të shpërndarjes së dhjamit. Dhjami viscerale, ai që rrethon organet e brendshme në zonën e barkut, është veçanërisht i rrezikshëm për shkak se prodhon substanca inflamatore që dëmtojnë zemrën dhe enët e gjakut.
Ekspertët rekomandojnë që njerëzit të mos mjaftohen me matjen e peshës trupore, por të matin rregullisht belin dhe raportin bel-vathë. Aktiviteti fizik, ushqimi i balancuar dhe ulja e konsumit të alkoolit janë mënyrat më të mira për të reduktuar dhjamin abdominal dhe për të mbrojtur zemrën.
Studimi rikujton se barku i birrës nuk është thjesht një shqetësim estetik: është një sinjal i qartë se zemra mund të jetë në rrezik. Në veçanti për meshkujt, mbajtja nën kontroll e dhjamit abdominal është një nga hapat më të rëndësishëm për të ruajtur shëndetin kardiovaskular.
