Nëse jeni në kërkim të një destinacioni të bukur bregdetar për pushimet tuaja, ka një vend në Evropë që nuk duhet ta anashkaloni: Riviera Shqiptare, kështu shkruan tabloidi briatnik “Express”.
Vit pas viti, Shqipëria po fiton gjithnjë e më shumë popullaritet falë vijës së saj bregdetare piktoreske, plazheve të pastra dhe çmimeve të përballueshme. Vizitorë nga e gjithë bota po tërhiqen nga bukuritë natyrore të vendit, ndërsa Lonely Planet e ka cilësuar Rivierën Shqiptare si “vendin më të bukur për t’u vizituar në Evropë”, pikërisht për shkak të plazheve të saj ende të qeta dhe të paprekura.
Riviera Shqiptare shtrihet përgjatë bregdetit nga Vlora dhe Palasa në veri deri në Sarandë dhe Ksamil në jug. Ajo ofron një kombinim të pazakontë të ujërave të kaltër-turkuaz, plazheve me gurë të bardhë, natyrës së egër, historisë së pasur dhe çmimeve shumë më të ulëta krahasuar me vendet e tjera mesdhetare.
Përveç plazheve të jashtëzakonshme, vizitorët mund të zbulojnë fshatra tradicionalë të gurit, kalatë historike, parqe arkeologjike dhe kuzhinën e shijshme shqiptare, që po fiton gjithnjë e më shumë vëmendje nga udhëtarët ndërkombëtarë.
Kur është koha më e mirë për të vizituar Rivierën Shqiptare?
Për të gjetur plazhe më të qeta dhe për të shmangur fluksin e turistëve, periudhat ideale janë: nga prilli deri në fillim të qershorit, si dhe nga shtatori deri në fillim të tetorit.
Gjatë këtyre muajve, temperaturat janë perfekte, çmimet më të ulëta dhe plazhet më pak të frekuentuara. Ndërsa korriku dhe gushti janë periudhat më të ngarkuara, ndaj nuk rekomandohen për ata që kërkojnë qetësi dhe hapësira të lira buzë detit.
Mënyra më e mirë për të eksploruar zonën është me makinë, pasi ju jep fleksibilitet për të vizituar plazhet më të fshehta dhe bukuritë natyrore. Megjithatë, zona është e aksesueshme edhe me transport publik, me linja të rregullta autobusi që lidhin qytetet bregdetare kryesore.
Riviera Shqiptare është një nga destinacionet më të bukura dhe ende të pazbuluara plotësisht në Evropë. Me peizazhe që të lënë pa frymë, ujëra kristal dhe çmime të arsyeshme, ajo mbetet një perlë që çdo udhëtar duhet ta vizitojë të paktën një herë në jetë. /Skyweb.al
