Ilaçet për humbje peshe po rezultojnë jashtëzakonisht të përdorura mes punonjësve me sigurim shëndetësor nga vendi i punës, por çmimet e larta të tyre po i detyrojnë shumë kompani të rishqyrtojnë mbulimin që ofrojnë.
Sipas një raporti të ri nga Kaiser Family Foundation (KFF) në SHBA, përqindja e kompanive shumë të mëdha, me mbi 5,000 punonjës që mbulojnë këto medikamente për trajtimin e obezitetit është rritur ndjeshëm, duke arritur 43% këtë vit, nga vetëm 28% një vit më parë. Në krahasim, vetëm 16% e firmave me 200 deri në 999 punonjës ofrojnë mbulim për ilaçet e humbjes së peshës, e njëjtë me vitin e kaluar.
GLP-1 medikamentet, si Ëegovy dhe Ozempic, janë krijuar fillimisht për trajtimin e diabetit, por janë bërë jashtëzakonisht të kërkuara sepse ndihmojnë pacientët të humbin peshë në mënyrë të efektshme. Megjithatë, kostoja e lartë rreth 1,350 dollarë në muaj për një furnizim të plotë, po e bën të vështirë për shumë punëdhënës të vazhdojnë mbulimin e tyre.
Edhe pse shumë kompani i shohin këto barna si një përfitim të vlefshëm për tërheqjen dhe mbajtjen e stafit, rritja e përdorimit ka tejkaluar pritshmëritë. Sipas KFF, gati 60% e kompanive të mëdha thanë se përdorimi i ilaçeve për humbje peshe është më i lartë se parashikimi i tyre, ndërsa dy të tretat raportuan se ndikimi në buxhetin e ilaçeve të përshkruara ka qenë “i rëndësishëm”.
Një kompani pjesëmarrëse në anketë raportoi se këtë vit ka shpenzuar më shumë për GLP-1 sesa për çdo ilaç tjetër, ndërkohë që një vit më parë, këto barna renditeshin vetëm në vendin e 32-të për nga shpenzimet.
Ekspertët e KFF theksojnë se situata po detyron punëdhënësit të gjejnë mënyra të reja për të balancuar përfitimet për punonjësit me menaxhimin e kostove. “Këto ilaçe janë një përfitim i rëndësishëm për punonjësit, por shpenzimet shpesh i tejkalojnë pritshmëritë,” tha Gary Claxton, nënkryetar i KFF.
Aktualisht, më shumë se 36 milionë amerikanë me sigurim nga vendi i punës kanë një indeks mase trupore që do t’i bënte të kualifikohen se kanë nevojë për medikamentet e dobësimit. /Skyweb.al
