Gazetari Julian Hoxhaj ka reaguar pasi emri i tij dhe emisioni “Plug” në Syri TV u përmendën në audiopërgjimin e publikuar nga ish-zëvendëskryeministri Arben Ahmetaj në emisionin “Çim Peka Live”.
Sipas materialit të transmetuar, në përgjim dëgjohet një bisedë mes biznesmenit izraelito-shqiptar Ron Yeffet dhe dy biznesmenëve ukrainas.
Hoxhaj deklaron se emri i tij përmendet në lidhje me denoncimet e bëra në janar të vitit 2026 nga emisioni “Plug” për aktivitetin e Yeffet në Shqipëri, përfshirjen e tij të pretenduar në industrinë ushtarake dhe tregtinë e armëve, si edhe lidhjet me ish-zyrtarin e FBI-së, Charles McGonigal.
“Unë dhe emisioni ‘Plug’ përmendeshim në tryezat e errëta të trafikut të armëve fill pas denoncimit për pasurimin e tij me paratë e shqiptarëve, në janar 2026. Ishte emisioni ku u denoncua për herë të parë ajo që po ndodh sot”, shkruan gazetari.
Sipas Hoxhajt, në emision ishin ngritur pikëpyetje mbi aksesin e Yeffet në asetet e ushtrisë shqiptare, aktivitetin e tij në tregtinë e armëve dhe raportet me McGonigal. Ai përmend gjithashtu një shumë prej 3 milionë eurosh, e cila, sipas tij, do të përdorej për nisjen e një operacioni.
Gazetari thotë se përmendja e emrit të tij në këtë audiopërgjim e ka vendosur nën presion dhe e bën të ndihet të kërcënuar për shkak të punës së tij.
“Çdo gazetar e ka të qartë se, kur emri i tij lakohet si bezdisës në diskutime për ‘gjëra të këqija’, nuk mund të ndihet i sigurt, por nën presion dhe kërcënim nga rrjetet më të errëta që njeh bota, ato të trafikut të armëve”, deklaron Hoxhaj.
Pavarësisht situatës, ai shprehet se nuk do të tërhiqet nga puna dhe denoncimet publike.
“Do të vazhdoj ta bëj detyrën time me të njëjtën përgjegjshmëri dhe vendosmëri, si gazetar dhe si pjesë e ekipit të emisionit ‘Plug’ në Syri TV”, përfundon Julian Hoxhaj.
