Kosova ka vendosur detyrim të përkohshëm antidamping ndaj importit të farës së grurit për mbjellje me origjinë nga Serbia. Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka bërë të ditur se ka nënshkruar vendimin për vendosjen e një detyrimi antidamping prej 0.04 euro për kilogram.
Sipas Kusari-Lilës, vendimi është marrë pas një hetimi të zhvilluar nga Ministria dhe dëshmive paraprake se fara e grurit është importuar me çmime damping, duke shkaktuar dëme për prodhuesit vendorë.
“Si Ministre në detyrë e Industrisë, Ndërmarrësisë, Tregtisë dhe Inovacionit, sot kam nënshkruar vendimin për vendosjen e detyrimit të përkohshëm antidamping prej 0.04 euro për kilogram ndaj importit të farës së grurit për mbjellje me origjinë nga Serbia”, ka deklaruar ajo.
Kusari-Lila ka theksuar se prodhuesit vendorë nuk do të lihen të pambrojtur përballë konkurrencës që e konsideron të pandershme.
“Tregu ynë duhet të jetë i hapur, por edhe i drejtë. Do të përdorim çdo instrument ligjor në dispozicion për të mbrojtur prodhimin vendor, konkurrencën dhe interesin ekonomik të Kosovës”, ka shkruar ajo.
Vendosja e kësaj mase vjen në një periudhë kur fermerët kosovarë janë përballur me shqetësime lidhur me çmimin e ulët të grurit. Gjatë këtij viti, çmimi i grurit në Kosovë është raportuar të jetë rreth 15 deri në 18 centë për kilogram.
Detyrimi i ri prej 0.04 euro për kilogram nënkupton se për çdo ton farë gruri të importuar nga Serbia do të aplikohet një detyrim shtesë prej 40 eurosh. /scantv.al
