Agjencia Shtetërore e Kadastrës ka publikuar procedurën që duhet të ndjekin qytetarët për regjistrimin e kontratës së shitjes së një prone.
Sipas ASHK-së, regjistrimi në regjistrin kadastral është hapi që konfirmon kalimin e së drejtës së pronësisë në favor të blerësit.
Nëse aplikimi kryhet brenda 30 ditëve nga nënshkrimi i kontratës, shërbimi i regjistrimit realizohet pa kamatëvonesë.
Qytetarët duhet të identifikohen fillimisht në portalin e-Albania dhe të zgjedhin shërbimin “Aplikim për regjistrimin e kontratave të shitjes – KP1”.
Më pas duhet të plotësojnë formularin, të ngarkojnë dokumentacionin në formatin PDF dhe të shkarkojnë mandatin e pagesës.
Pagesa mund të kryhet online, në bankë ose pranë pikave të Postës Shqiptare.
Ndër dokumentet e kërkuara është kontrata e shitjes, së cilës duhet t’i bashkëngjiten certifikata e pronësisë, kartela e përditësuar dhe harta kadastrale.
Kërkohet gjithashtu certifikata familjare ose martesore e palës blerëse, si dhe vërtetimi nga bashkia për shlyerjen e taksës së ndërtesës, kur pasuria është ndërtesë.
Në rastet kur gjen zbatim, duhet të paraqitet edhe mandati i pagesës së tatimit ose taksës së kalimit të pronësisë.
Për kontratat e lidhura ndërmjet ndërtuesit, zhvilluesit ose investitorit dhe blerësit, kërkohet edhe kontrata 10-vjeçare e sigurimit në favor të blerësit.
Kur aplikimi nuk bëhet drejtpërdrejt nga pronari ose bashkëpronari, duhet të dorëzohet akti i përfaqësimit apo prokura.
Pas aplikimit online, dokumentacioni origjinal duhet të dërgohet me postë në adresën e drejtorisë vendore të ASHK-së që administron zonën kadastrale ku ndodhet prona.
